Namminersulernissaq tapersersorluarneqarpoq

Naaggaartup tupiginngilaa, angertut amerlanerussuteqarluarnerat.

- Namminersorneq pillugu taasisoqannginnerani inatsisartunut qinersisoqarnissaa kissaatiginarsimassagaluarpoq. Taava Namminersornermut angersimassagaluarpunga. Kisianni taama qinersisartut amerlatigisut peqataaneranni, taamallu amerlatigisut angerneranni, angusaq ajoriinnagassaanngilaq, Hans Breiner oqarpoq.

- Neriuutigiinnassavarput Namminersorneq eqqunneqarpat oqartussat Kalaallit Nunarput aqulluarsinnaassagaat. Kisiannimi pakatsinngilanga. Tullinnguuttoq tassaalerpoq qinersinissaq, qinersinissavik, inatsisartunut, Hans Breiner naggasiivoq.

Angertoq ippassaq oqarpoq 76 procentit angernissaat ilimagalugu. Taasinerup inernera tusareerlugu qanormitaava Poul Møller ullumi misigiva?

- Takusinnaasakka naapertorlugit angertut 75, 54 procentiupput. Tulluusimaarnarpoq taama amerlatigisut angermata. Nuannaaqaanga. Aamma eqqoriarakku 75 procentit taasiartussasut 71 procentit taasiartorsimapput. Amerlaqaat, Poul Møller oqarpoq.

Angertut qitigiartarfimmi Manhattanimi novembarip ulluisa 25-ianni taasisitsinerup unnukkuani unnussiuaarrakkaluartut Møllerikkut peqataanngillat.

- Naa, ilaquttavullu angerlarsimavugut, issiaarluta nuannisaarlutalu. Eqqissivilluta taasinerup unnukkuani malinnaavugut, ilaannikkullu nilliasarluta, soorunami, nangippoq.

Inuiattut akisussaaffit annertuut tigusussanngorivut qularutiginngilaa.

- Tamarsuisa ataatsikkut tigunavianngilagut. Suliassaqartorujussuussaagut, tigujartuaagassat tulleriiaarlugit siunissami tiguneqassappata, Poul Møller naggasiivoq.