Namminersulernissamut inatsit siunnersuutigineqartussanngorpoq

Siullermik Naalakkersuisut danskit naalakkersuisuinut saaffiginninnissaminnut inatsisartut apereqqaassavaat, ministeriunerlu Anders Fogh Rasmussen Kalaallit Nunaata namminersulernissaanut inatsimmik siunnersuuteqaqqullugu. Naak Danmarkimi politikerit nunatsinni taasisitsinerup inernera nalunngikkaluaraat, Folketingimi inatsit akuerineqaqqullugu Naalakkersuisut pisortatigut saaffiginnittussaasut, namminersorneq pillugu allaffeqarfimmi pisortaq, Mininnguaq Kleist, oqarpoq.

Naalakkersuisut danskit Naalakkersuisuinut qaqugorpiaq saaffiginnissanersut suli ilisimaneqanngilaq. Taasisitsinerummi inernera Qinersinermut Naliliisartunit akuerineqaqqaartussaavoq, suut tamarmik marloriarlutik misissorneqarlutik naliliiffigineqaqqaartussaammata.

Taassuma saniatigut taasisitsinermit ullut arfineq marluk qaangiutsinnagit maalaaruteqartoqarsinnaavoq, Namminersornerullutik Oqartussani Nunami pissutsinut siulersuisoqarnermullu immikkoortortaqarfik taama nalunaarpoq.

Nutaarsiassaqartitsivimmi Ritzauimi allaaserineqartut naapertorlugit danskit Naalakkersuisui namminersorneq pillugu inatsimmik februaarip qaammataani saqqummiussissapput.

Inatsisartut taasisitsinerup inernera tallimanngorpat oqaluuserereerunikku, danskit naalakkersuisuinut saaffiginninnissaat ilimagineqarpoq.