Namminersulernissamut Allattoqarfik Demokraatit naammaginngilaat

-Namminersorneq pillugu Allattoqarfikup saqqummiinera ima isikkoqarsinnaagami soorluuna arlaannaannulluunniit attuumassuteqanngitsumik saqqumiisartut, tassa nuannersortaa nuanniitsortaaluunniit saqqummiuttussaallugit. Kisianni taamaattoqannginnami. Namminersorneq pillugu Allattoqarfik naalakkersuisut ataanni sulivoq, taamaammat pisussaatitaapput naalakkersuisut politikkiat piviusunngortissallugu, tassa oqaannaraanni angertitsiniarneq, Jens B. Frederiksen oqarpoq,

Namminersorneq pillugu Qaqortumi ippassaq unnukkut paasisitsiniaasoqareernerata kingorna.

Partiini sisamaasuni Demokraatit kisimik namminersulernissamut novembarip ulluisa 25-anni taasinissami inuiaqatigiinnik naaggaaqqusillutik siunnersuipput.

Partiini kisimiillutik akerliunertik qanoq igineraat Jens B. Frederiksen aperaarput, akivorlu:

-Soorunami kisimiittuulluni pikkunarpoq, iluarnerussagaluarpoq arlariissimagaluarutta, kisianni allatut ajornaqaaq, uagut suliassarput nikallunngivilluta aallupparput.

Namminersorneq pillugu paasisitsiniaasoqarnerani aqutsisoq, Namminersorneq pillugu allattoqarfimmi atorfilik Mininnguaq Kleist, inuiaqatigiinnut paasissutissiiniarlutik qanoq iliortarnerannik aperaarput. Ima akivoq:

-Isumalioqatigiissitap isumaliutisdsiissutaa saqqummiutissallugu, pitsaasuusinnaasut ajortuusinnaasullu, artornarnerulaarsinnaasut,taakku saqqummiutissallugit suliassaraavut. Taava soorunalimi taakku paasissutissat kikkunnit tamanit apeqquserneqarsinnaapput, kisianni uagut taanna suliassarinngilarput, taakku paasissutissat isumaliutissiissummiittut partiit assigiinngitsut oqallisigisinnaavaat, aamma tusagassiortut taamaaliorsinnaapput.