Namminersulernissamik apeqqut inuusuttut nalornissutigaat

3.G-mi ilinniartut 18-init taasisitsisuusaarmata qulingiluat angerput arfineq-pingasut naaggaarlutik. Ataatsip suli naluaa angissanerluni naaggaassanerluniluunniit.

Namminersorneq pillugu Isumalioqatigiisitami ilaasortap Kuupik Kleistip nassuerutigaa paasititsiniaalluarnerusariaqarlutik.

- Apeqqutit amerlanerpaat imatut aallaaveqarput junip 21-ani 2009-mi aningaasarpassuarnik akiliissassugut, taamatuttaaq inuusuttut isumaqarput uuliap kisimi kalaallit annaassinnaagai. Tamakkualu eqqortuunngitsut kisianni oqaatigineqaqattaartut malunnarpoq sitsiussimasut, Kuupik Kleist oqarpoq.

Inuusuttulli isumaqarput misigissutsit tunngaviginagit Kalaallit Nunaata nunarsuup sinneranik suleqateqarnerusariaqarnera isigineqarnerusariaqartoq.

Aamma paasiuminaatsinneqarpoq meeqqat atuarfiini, ilinniarnertuunngorniarfinni ilinniarfinnilu kalaallisut ilinniartitsissutit pigineqannginnerat naak kalaallit oqaasii pingaarnerutikkusunneqaraluartut.

Aamma malunginngitsuugassaanngilaq ilinniarnertuunngorniat politikerinik tusaamanerluimmata. Ilaat isumaqarput pisaaneqarusunneq piinnarlugu Kalaallit Nunaat namminersulerpat kalaallit aamma artukkersorneqalissasut, ernumanarmat oqartussaaffiit sukkavallaamik tigoorarneqalersinnaanerat.

Allamiut uuliasiornermikkut aatsitassarsiornermikkullu mingutsitsivallaarnerat uparuartorniannguarlugit Kalaallit Nunaat namminersortoq uuliamik aatsitassanillu isumalluuteqarniarmat paasiuminaatsinneqarpoq. Ilinniarnertuunngornianit aamma ugguarineqarpoq unneqqarissumik namminersornerup oqallisigineqarsinnaajunnaarsimanera. Ilaat misigisimapput qaamasumik nujaqaramik tungujortunillu iseqarlutik akooqqusaajunnaarsimallutik. Namminersornermut naaggaartut ilaat nipagiinnartalersimapput oqarfigineqartaramik naagaarunik qallunaanut angertuullutik. Ilinniarnertuunngornialli Palu Berthelsenip isummami oqaatiginissaa qunuginngilaa. Palu naaggaassanerarpoq imalu oqarluni:

- Naaggaapunga pissutigalugu pissutsit massakkut takullugit ilimanarpallaanngimmat Kalaallit Nunaata nammminersornissaa. Taama oqarpoq Nuummi 3.G-mi ilinniartoq Palu Berthelsen.