Namminersulernerput Fjaltringimi suli malunnartippaat

Nunatta namminersulernera Jyllandip Kitaani Fjaltringimi suli malunnartinniarneqarpoq, malunnartitsiniarnerillu aasaq tamaat ingerlanniarneqarput.
juulip 15-at 2009 08:20

Kalaallit kulturiannik ingerlatsivimmi Tuukkami malunnartitsiniarnerit ingerlanneqarput, taanna 1970-ikkunniit 90-ikkunnut isiginnaartitsisartoqatigiinnit Tuukkakkunnit najugaqarfigineqarpoq.

Inuiattut ullorsiornitsinni, juunip ulluisa 21-anni, saqqummersitsineq taaguutilik AATSITSIVIK - SMELTEDIGEL - ammarneqarpoq, eqqumiitsuliortut Miki Jakobsenip aamma Camilla Nielsenip qalipagaat, qiperugaat, assinik assiliarsualiat ataatsimoorullugulu sammisamut sikumut innermullu tunngasut tassani saqqummersinneqarput, taamaattumillu saqqummersitsineq taaneqarluni "Aatsitsivik".

Tamatuma saniatigut Nunatsinnut tunngasunik kulturikkut unnussiortitsinerit aaqqissuuneqartassapput.

Erinarsoqatigiit "Aqisseq" Tuukkap inersuani tallimanngorpat juulip ulluisa 17-ianni tusarnaartitsissapput, kalaallit erinarsuutaannik pisarnertik malillugu qiimasumik erinarsussallutik. Erinarsoqatigiit Aqisseq tassaapput kalaallit Sjællandip Kujataani aamma Lolland-Falsterimi najugallit, 1997-imiilli erinarsoqatigiittalersut.

Fjaltringimi malunnartitsiniarluni tusarnaartitsinermik aaqqissuussineq tulliuttoq aggustip arfineq-aappaani pissaaq, tassani Rasmus Lyberth tusarnaartitsissammat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq