Namminersulerneq nalliuttorsiutaallualereerpoq

- Allanngulerfiup anersaava nunatsinni misigaarput ullumimi Kalaallit Nunaannik namminersortumik anguniagaq piviusunngorpoq. Nuannaarnerup ullua, qujamasunnerup ullua, borgmester Asii Chemnitz Narup oqalugiaanni aallartippaa.

Oqalugiarnera aallartinngilaartoq erfalasoq amuneqartillugu erinarsoqatigiit tusarnivissumik erfalasoq pillugu erinarsorput, kingornalu sillimanngitsunut tupassutaagunaqisumik nunamit qamutilittarneqarpoq, imaani sorsuummit akineqartumik.

-Asasakka nunaqqatikka. Ullaaq iterpugut misigissuseq nutaarluinnaq pigalugu. Iterpugut neriuutit nutaarluinnaat uummammioralugit. Nunatta oqaluttuarisaanerani nutaamik alloriartussanngorpugut. Ulloq manna pingaartoq persuarsiornartoq kingumullu qiviarluta killisimananngitsuunngitsoq aallarnerparput. Iterpugut soorlulusooq aperlaami illernit nutaat kinguaatta aqqusaagassaat pilersittussanngorlugit, Naalakkersuisut siulittaasuat Kuupik Kleist inuppassuarnut Nuup saavani katersuuttunut oqalugiaanni aallartippaa.

Oqalugiarnerata nalaani kunngikkormiut takkupput, Ataqqinartorsuaq Dronning Margrethe, uia Prins Henrik aamma kunngissaq Frederik nulialu kronprinsesse Mary politiinit ingiallorneqarlutik takkummata.

Erinarsoqatigiit najuuttullu inuiattut erinarsuutivut erinarsoreermatigit Naalakkersuisut ilaquttatik ilagalugit kunngikkormiullu Annaassisitta Oqaluffianukarput, tassani naalagiassallutik.

Aqqusinikkut ingerlaarneranni inuppassuarnit assuartunit nuannaaqisunillu erfalasuaralisartunit ilassiorneqarput.