Namminersortut Pilersuisumut unammillernissamut kaammattorneqarput
Pilersuisup annikillisaanerminut nunaqarfinniit illoqarfinniillu minnernit inuit nuutsitserneri peqqutaatippai, kisianni tamanna aqqutissaanngitsoq namminersortoq pisiniarfiutilik kommunalbestyrelsimilu ilaasortaq isumaqarput.
- Tulliani umiarsuaqaqqippat aalisarnermut atortut 12 tonsit maanga tikissapput, Upernavimmi 1999-simiilli sanaartornermik suliffeqarfiutilik Niels Berthelsen oqaluttuarpoq.
Sanaartornermi suliffiutimi saniatigut aalisarnermut atortunik pisiniarfiuteqarpoq, ukiunnginneranilu pisiassaatini atisanik nerisassanillu aamma ilassavai.
Oqaluttualiarli tassunga naanngilaq. Tassami Kullorsuarmi pisiniarfimmik quimillu 200 kvadratmeterimik angitigisumik aamma sanavoq.
- Aamma amerlanerugaluarutta ajoqutissartaqanngilaq. Soorlu maani Upernavimmi naminersortuaqqat pisiniarfiutillit arlalerujusuupput, Niels Berthelsen oqarpoq.
Pilersuisoq Namminersorlutik Oqartussat kiffartuussinermut isumaqatigiissummik nutaamik isumaqatigiinnialernerit soqqullugit aarlerisaarivoq pisiniarfiutimi pisiassanik qinigassakinnerulissasoq ammasarfiillu sivikinnerulissasut.
- Ukiuni qaninnerni nunaqarfimmiut 8 procentimik ikileriassapput, taamaammat tulluarsartariaqarpugut, Pilersuisumik piginnittuusup KNI-mi siulersuisuni siulittaasoq Michael Skourup oqarpoq.
Isak Hammondip Qaasuitsup Kommuneani kommunalbestyrelsimi ilaasortaatigaluni IA-miit Inatsisartuni ilaasortap kissaatigivaa Pilersuisup sipaarniarluni pilersaarutai kommunimi eqqartorneqassasut.
Kommunalbestyrelsemilu ilaasortaqataa Bernhardt Olseni Siumumeersoq ingerlariaqqippoq sumiiffinni assigiinngitsuni innuttaasunut kaammattuilluni, Pilersuisoq unammillerniaqqullugu. Pilersuisup Savissivimmi pisiniarfia takusimasani assersuutigaa:
- Pisiassakeqaaq aalisarnermullu atortunik soqanngilluinnarluni. Tassalu aalisartut aalisarsinnanngillat, Pilersuisumi atortussanik pisisinnaannginnamik. Pilersuisup sanngiiffii taamaattut namminersortuaqqat atorluartariaqarpaat, Bernhardt Olsen oqarpoq namminersorlutillu suliffiutitaarusuttut kaammattorlugit, Qaasuitsup Kommuniata inuussutissarsiornermut siunnersuisui atorluaqqullugit, taakkua allartisarnissamut siunnersuuisinnaammata.