Namminersortut mittarfiliortoqarnissaanik kissaateqarput

Angallassinermut isumalioqatigiissitap innersuussutaanut, tassalu Qaqortumi timmisartunut mittarfiliorniarnermut, Kommune Kujallermi kommunalbestyrelsep angallannermut ataatsimiisitaliaata isumaqataannginnera, Kujataani innuttaasunik tamanit isumaqataaffigineqartutut oqaatigineqarsinnaanngilaq.

Angallannermut ataatsimiisitaliap isumaqataannginnermut patsisiliuppaat, mittarfiup naappallaarnera, tassami 1199 meteriinnappat, Atlantikoq qulaallugu kujataa miffigineqarsinaajunnaassammat.

Angallannermut ataatsimiisitaliap isummersuutaannut maanna kujataani inuusutissarsiortut akipput. Angallassinermut isumalioqatigiisitap innersuussutaannut taakku isumaqataapput.

Inuussutissarsiornermik ingerlataqartut isumaqarput, angallannermut isumalioqatigiissitap innersuussutaa, tassalu mittarfiup 1199 meterisut takitiginissaa, kujataani aatsitassanik piiasoqalernissamut naleqqussagaalluartoq, Kujataani inuussutissarsiornermik ingerlataqartut ataatsimut nalunaarutaanni, Jim Riis-i, Qaqortumi Hotel-mi pisortaq siuttoralugu allapput.

Taakku aamma isumaqarput, maanna timmisartoqarfiup inissisimanerata nassatarigaa, kujataani aningaasarsiornissaangaluaq killilersimaarneqartoq, tassami Narsarsuarmiit Qaqortumut timmisartuussisarnerit piffissamik eqquineq ajormata.

- Kujataani illoqarfiit avataanni ataatsimiinnissat pilersaarusiorneq ajornaqaat, tamannalu uagut nammineq timitsigut misigisaqarfigisaqaarput, tassami pisuussutiginngisatsinnik allami uninngatinneqartaratta, kujataani inuussutissarsiornermik ingerlataqartut ataatsimoorlutik ilaatigut taama allapput.

Taakku siunnersuutigaat, Kommune Kujallermi angallannermut ataatsimiisitaliaq innuttaasunik ataatsimeersuartitsissasoq, taamaaliornikkut kikkut tamarmik isumaannik saqqummiussisinnaaniassammata.