Namminersortut imaatigut angallannermut malittarisassiulersut
Takornariartitsinermik aatsitassarsiornermillu suliaqartut allallu Issittumi angalasartut maluttarisassanut nammineq kajumissutsiminnik ilanngutsitinnissaat eqqarsaataavoq. Taamatut suliniuteqartuupput eqqartuussissuserisoq Irlandimiu Michael Kingston eqqartuussissuserisoqarfimmit DWF Fishburnsimeersoq, inuussutissarsiutinik ingelaqartunut akisussaanermut sillimmasiinernik suliaqartuusoq aammalu Åke Rohlén, siunnersuisarfimmi Arctic Marine Solutionsimi siulittaasuusoq.
-Issittumi piffiit unamminartupilussuit ornippagut, inuussutissarsiornikkummi suliat soqutinartupilussuit aallartisarneqarnerisa maanna nalaanniippugut, kukkusoqassagaluarpalli ajutoortoqarlunilu, taava imaassinnaavoq niuerfik nutaaq pilersinneqanngitsoortoq. Issittumi suliniutaasut annertuupilussuupput, kukkunissamullu inissaqartitsisoqarani, Åke Rohlén oqarpoq.
Best Practicemik Isumaqatigiissut ingerlatsiviit umiarsuarnik Issittumukartitsinnginnerminni qulakkeeqqaagassaannik arlariinnik immikkoortoqarpoq - soorlu sumiiffimmik misissueqqissaarnissaq, sikoqarneranut naleqquttunik atortorissaaruteqarnissaq, inuttat pisariaqartunik ilisimasallit aammalu suliaqartut allat misilittakkanik avitseqatigisarnissaat. Malittarisassanik suliaqartut taakku marluk naapertorlugit Issittumi imaatigut angallannermut inatsit maannakkorpiaq amigarsorinarpoq.
- Oqaluttuariaanermi qasseeriarluta takoreerparpu ajutoornerup kingorna aatsaat inatsisinik pisariaqartunik aalajangersaasoqartartoq, Michael Kingston oqarpoq.
- Inatsisiliornermik pitsaanerpaamik ukiut tallimat-qulit qaangiuppata peqalernissaata tungaanut suleriaatsimik pitsaanerpaamik atuinissatsinnik Issittumi illuatungeriit namminneq kajumissutsiminnik isumaqatigiissusiortinnerisigut inatsisiliornermi amigaatigineqartut iluarserusuppagut, Åke Rohlén aamma oqarpoq.
Issittumi imaatigut angallannermi ikitsuinnaat maannakkut angallassisuummata, tamarmik isumaqatigiissummut tapersiisissinnaanissaat iluatsissinnaassanasoraat.
-Suliffissuaqarnermimi najoqqutassanik isumannaatsunik atuinngitsut piariaqartinngilaat, tamannami suliffissuaqarnermut tamarmut ajornartorsiortitsileratarsinnaammat, Michael Kingston oqarpoq.
Taassuma aamma oqaatigaa ingerlatsiviit angisuut arlallit isumaqatigiissummut ilaaniarlutik nalunaareersimasut.
Sillimmasiisarfiit isumaqatigiissummik suliaqaqataanerat Issittumi ajutoortoqarsinnaanerata annikillisarnissaanik soorunami peqquteqarpoq. Aamma Imaani angalannermut sillimmasiisarfiit kattuffissuat IUMI suliummut tapersiilluni nalunaaruteqareersimavoq.
Best Practicemik Isumaqatigiissut Issittumi suliaqartunit assigiinngitsunit ukiup nutaap ingerlanerani eqqartorneqarussaavoq, suliniuteqartullu ingerlatsiviit isumaqatigiissummut ukiup nutaap ingerlanerani pisortatigoortumik ilanngukkumaartut neriuutigaat.
