Namminersortunngorsaanissamut pilersaarutit aalajangiusimaneqartut

Royal Greenlandip namminersortunngorsarneqarnissaanut pilersaarutit Naalakkersuisut siulittaasuata, Kuupik Kleistip, ukiortaami oqalugiaammini eqqaanngimmagit, KNAPK-p pakatsissutigaa. Pilersaarutilli allanngunngitsut Naalakkersuinit oqaatigineqarpoq.
januaarip 07-at 2010 05:50

Inuit Ataqatigiit sinnerlugit Inatsisartunut ilaasortap, Hans Aronsenip, paragraf 36 najoqqutarlugu apeqqutaanut Naalakkersuisut siulittaasuat, Kuupik Kleist, akivoq, pilersaarutit allanngunngitsut.

Royal Greenlandimi siulersuisut tassaapput oqartussani qullersaasut, naatsorsuutigisalli eqquutsinngippatigik, ukioq manna ataatsimeersuartoqalerpat siulersuisunut ilaasortat Naalakkersuisut soraarsissinnaavaat, tassami piginneqataagamik.

- Taamaammat Naalakkersuisut naatsorsuutigaat, ingerlatseqatigiiffiup immikkoortortaanik ataasiakkaanik arlalinnilluunniit tunisinissamut periarfissat, siulersuisut qullersaqarfiullu ingerlaavartumik isumalioqatigiillutillu nalilersueqatigiiffigisassagaat, Kuupik Kleist akissummini allappoq.

Suliffeqarfiit ingerlatseqatigiiffiillu Namminersorlutik Oqartussanit pigineqartut, aamma Royal Greenlandip, namminersortunngorsarneqarnissaanik Kuupik Kleistip kissaataa, Københavnimi Kalaallit Illuutaanni ukiarmi oqallitsitsisoqarmat siullermik saqqummiunneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq