Namminersortunngorsaaneq oqaluuserisassatut pingaarnertut
Nalunaarusiaq 54-inik quppernilik aallaavigalugu, aningaasaqarnikkut imminut nammassinaanerulernissamut atatillugu suliffeqarfiit qanoq Naalakkersuisunit isummersorfigineqarsimanerannut tunngavoq.
Nalunaarusiap imaanut tunngasunik oqallinneq Inatsisartuni ippassaq suliffeqarfiit namminersorlutik inuussutissarsiortunut tunineqarsinnaanerannik akissummik erseqqissumik inerneqanngilaq. Erseqqissumillu akissutissaqalernissaq ilimagineqarsimanngilaq. Suliarmi annertuvoq pisariullunilu, suliffeqarfiimmi aqqanillit tamakkiisumik Namminersorlutik Oqartussanit pigineqartut suliffeqarfiilu allat pingasut annertuumik piginneqataaffigisaat pineqarmata. Suliffeqarfinni taakkunani arfineq marluk nunatsinni suliffeqarfinni annerpaanut ilaapput - aningaasarsiorneq suliffissaqartitsinerlu eqqarsaatigalugit.
Suliffeqarfiit Royal Greenland, KNI, Royal Arctic Line, Tele Greenland, Air Greenland-ilu eqqaaginnakkit, Grønlandsbankenilu Namminersorlutik Oqartussat 13,7 procentimik piginneqataaffigisaat.
Ataatsimut isigalugit taakku suliffeqarfiupput inuiaqatigiinni aningaasarsiornermut pingaarutillit. Ataatsimoorlutik inunnik 4.000-it missaannik sulisoqarput taakkulu saniatigut suliffeqarfiit namminersortut suliffeqarfiillu minnerit suliffeqarfissuarnik Namminersorlutik Oqartussanit pigineqartunik pinngitsuuisinnaanngillat. Suliffeqarfissuarni Namminersorlutik Oqartussat pigisaanni anginerni tallimani aningaasanik ukiumut kaaviiaartitat 6,4 milliardit koruunit missarivaat, allatut oqaatigalugu nunatsinni suliffeqarfiit piginneqatigiiffiit tamarmik kaaviiaartitaasa katinnerisa 40 procentiisa missaat. Tassalu suliffissuit nunatsinni sunniuteqarluinnartut eqqartorneqarput.
Taamaattumik pisariaqarpoq piginnittup - tassani pineqarput innuttaasut sinnerlugit Naalakkersuisut - suliffeqarfiit ataasiakkaarlugit erseqqarissunik anguniagaqarfigissagai iliuusissanillu pilersaarusiorfigissallugit aamma suliffeqarfiit siulersuisuinut malittarisassiussasoq erseqqarissunik. Tamakkuli saniatigut politikerit suliffeqarfiit ulluinnarni aqunneqarnerannut akuliutissanngilluinnarput.
Namminersorlutik Oqartussat mianersorlutik pisariaqarput, kukkuninnguimmi annertuunik kingunerlutsitsisinnaammata. Suliffeqarfiimmi Namminersorlutik Oqartussanit pigineqartut naalakkersuinikkut pisussaaffiligaapput aammali niuernikkut aningaasarsiortussaallutik. Tassungalu tunngatillugu Naalakkersuisut, nalunaarusiaq naapertorlugu, ersarilluinnartumik isumaqarput: Suliffeqarfiit imminut akilersinnaanngitsut atorunnaarsikkiartorneqassasut. Suliffeqarfiillu naalakkersuinikkut pisussaaffilikkanik suliaqassappata, aatsaat suliffeqarfiit namminersortut suliarisinnaanngippassuk, inatsisitigut, akuersissutitigut kiffartuussinermik isumaqatigiissutinilluunniit tamanna suliakkiunneqartassaaq.
