Namminersortunngorsaaneq naalakkersuisunit peqqussutigineqarpoq

Inatsisartut tassa ataatsimiinnerminni Royal Greenland oqaluuserinngitsoorpaat. Naalakkersuisut nassuiaataanni oqaatigineqaraluarpoq Royal Greenland naalakkersuisunit kajumissaarneqarsimasoq namminersortunngorsarneqarnissaminut tamarmiluunniit namminersortunngornissaminut periarfissanik misissueqqullugu. Royal Greenlandillumi danskit aningaasaliisarfiat Alfred Berg tamatumani ikiortiserisimagaa tusareerparput.

Simon Olsenip nassuiaatissamini aamma oqaatiginiaraluarpaa suliffissuup namminersortunngorsarnissaanik naalakkersuisut namminneq misissueqqissaartitsiniartut Royal Greenlandilu misissuisitsinissamut tunuarsimaarallartariaqartoq misissuisitsiniarunilu Naalakkersuisut suleqatigilluinnarlugit taamaaliortariaqartoq.

Naalakkersuisut siunniuppaat suliffissuup namminersortunngorsarnissaanik misissueqqissaarnertik 2005-p naanerani inereersimaniarlugu.

Aalisarnermut tunngasut inatsisartuni oqaluuserinissaat tassa qaquguugaluarnersumut kinguartinneqarput.