Namminersornerusut Nukissiorfillu uuttuusersuinissaq isumaqatigiinngissutigaat
Namminersornerullutik Oqartussat kommunillu ilaqutariinnut illuutai tamarmik imermut uuttuusersorneqarnissaat Namminersornerullutik Oqartussanit anguniarneqarpoq, Nukissiorfilli suleqataajumanngilaq.
Ineqarnermut Naalakkersuisup Jens Napaattuup apriilip 18-iani Inatsisartunut siullermeerlugu saqqummiuppaa, inissianik attartorneq pillugu siunnersuut. Siunnersuutip iluani allaqqasoqarpoq ukioq 2010 nallertinnagu Namminersornerullutik Oqartussat kommunillu ilaqutariinnut arlalinnut illuutai imermut uuttuusersorneqassasut, taamaalilluni illugisami imermik nillertumik kissartumillu atuinermut tamakkiisumut aningaasartuutinut naatsersukkat, immikkut atuineq malillugu attartukkanut ataasiakkaanut agguaanneqarsinnaassallutik.
Nukissiorfinnulli tusarniaanermi Nukissiorfiit suleqataajumanngitsut Ineqarnermut Pisortaqarfimmi immikkoortortaqarfimmi pisortaq Olafur P. Nielsen oqarpoq. Suleqataajumannginnerannullu peqqutaasoq inissianut imermut uuttuut ataasiinnaq taamaallaat suliariumagamikku, massakkutut ingerlaannarlutik. Tamanna pillugu Olafur P. Nielsen oqarpoq:
- Tupaallaatigaarput Nukissiorfiit suleqataajumanngimmata, oqarmatami inissiamut ataatsimut imermut uuttuut taamaallaat atorneqassasoq. Nukissiorfiit imermik tunniussisuugamik suliassaq tigummisussaagaluarpaat. Isumaqaraanni pissutsit ullumikkutut ingerlaannassasut qangatut eqqarsarnerussaaq, tamattami soqutigaarput imermik atuinerput pitsaanerulissasoq, Olafur P. Nielsen oqarpoq.
Nukissiorfinniilli erseqqissarneqarpoq inatsisit malillugit suliniarlutik. Nukissiorfiup pisortaa Svend Ove Nielsen oqarpoq:
- Inatsisiliunneqartut soorunami malillugit ingerlassaagut, misissuigamalu init ataasiakkaarlugit imermik atuinerannut uuttortarneqartalernissaannut isummerpugut soorunami inatsisit malillugit sulissalluta, Svend Ove Nielsen oqarpoq. Aamma oqarpoq, suleqataajumanngitsutut taaneqarnertik eqqunngitsoq.
Olafur P. Nielsen-ip nuannaarutigaa tusarlugu Nukissiorfiit suleqataajumalersimammata.