Assi: Merete Lindstrøm

Atuagaq nutaaq Namminersornerup siulittaasua siulleq Kuupik Kleist piffissap ingerlanerani

Inuit Ataqatigiinneersup Kuupik Kleistip aamarsuarsiorfiusimasumi meeraaneranit atuarneranut Danmarkimilu inuusunnermini inuttut unammillissuteqaranit nunatsinni nunanilu allanut politikkikkut sulinera atuakkami nutaami malinnaaffigineqarsinnaavoq.

 Atuagaq Nunatsinni Namminersornerup ukiunik qulinngortorsiorneqarneranut atatillugu saqqummersinneqarpoq.

Kuupik Kleistip atuagaq Nuummi Atuagkani marlunngornermi saqqummersimmagu KNR najuuppoq. 

Kuupik Kleist inuunini politikkikkullu sulinera pillugu atuakkiornissamut siullermeertumik aperineqanngilaq, aatsaalli akuersivoq. Matumani Danmarkip, Nunatta USA-llu akornanni pissutsinut aamma danskit kalaallillu attaveqatigiinnerisa allanngoriartornerannut suut pissutaanersut, soorunamilu Kuupiup nammineq oqaluttuarisaanermi inissisimaneranut tunngasumik atuakkiortoqarnissaa, AG-ip siunnersuutigaa.

- Tamatumuuna akuersininnut pissutigivara, uannut tunngaannarani kisianni aamma nunatta oqaluttuarisaaneranut tunngassuteqarmat.

Atuakkap Kuupik Kleistip inuttut qanoq ittuunera, peroriartornera aqqutaanilu unammillissutaasa ilaat oqaluttuarai. Inuillu assigiinngitsut Kuupik Kleistip inuttut politikeritullu qanoq ittuuneranut aamma oqaaseqarput.

Ikinngutinit politikkikkullu akerlerisanit nersualaarinerit

Politikikkut ilagisaanit akerlerisaanillu nersualaarinermik oqaaseqartoqarpoq.

Lars Emil Johansenip (S), Jens B. Frederiksenip (D), Savalimmiunit Høgni Hoydalip aamma ilaatigut Villy Søvndalip (SF) Kuupik “Kalaallit Nunaata naalakkersuisuini siulittaasuusimasuni nukittunerpaatut ilisimasaqarnerpaatullu nassuiaatigaat”.

Kuupik Kleistip nersualaarinninnerit qanoq iginerai aperigatsinni kikkut apersorneqassanersut nammineq aalajangersimanagit erseqqissaatigaa.

- Soorunalimi nuannerpoq allat ajunngitsumik iliuuseqarsimasoralunga isummersornerat.

Atuagaq aliikkutarineqassasoq

Atuakkamik atuartut Nunatta politikkikkut ukiuni 50-ini kingullerni inissisimaffigisaanut, nunatsinniinngaanniiginnaanngitsoq aammali nunarsuatta sinneranit sunniutaasut ilaannut ilisimasaqalernissaat, Kuupiup neriuutigaa.

- Soorunami neriuppunga aliikkutarineqarsinnaasoq, atuakkanik atuarluni nuanneqimmat aammalu aliikkutaasarmat. 

Atuagaq Kuupik Kleistip nammineq imminut tunngasumik piffissap ilaani atuakkiorusunneranut aporfiunavianngitsoq erseqqissaatigaa.

Atuagaq “Kuupik Kleist - Drømmen om Frihed” tassa kiffaanngissuseqarnissamik takorluugaqarneq allalluagaavoq. Atuagaq kalaallit politikkikkut ingerlatsinerannut Nunatsinnilu polikerit annerit ilaata eqqarsaatigisimasaanut paasisimasaqarlualertitsivoq. Atuagaq naapertorlugu Kuupik angutaavoq ataqqineqartoq ataqqineqarsimasorlu politikkikkullu sulinermini ilaminit akerlerisaminillu nuannarineqartoq.

 Atuagaq sermitsiaq.ag-mi tusagassiortunit Niels Ole Quistimit Christian Schultz Lorentzenimillu atuakkiarineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat