Namminersornerullutik Oqartussat piginneqatigiiffii tamakkiisumik misissorneqarsinnaalissapput

Inatsit, Namminersornerullutik Oqartussat tamakkiisumik ilaannakortumilluunniit piginneqataaffigisaasa aningaasaqarnikkut qanoq inissisimanerannik misissuititsisinnaanngortoq, ukiut arfinillit piareersarneqareerluni, Inatsisartunut kiisami annguppoq.

-Piginneqatigiiffiit Namminersornerullutik Oqartussat tamakkiisumik ilaannakortumilluunniit pigisaasa landskarsip naatsorsuutaanni Kukkunersiuinermut Ataatsimiititaliami tassa pulasinnaanngorpoq, Naalakkersuisut siulittaasuaq Hans Enoksen oqarpoq.

Suliffeqarfinni Namminersornerullutik Oqartussat pigisaanni nakkutilliineq, inatsisartut sinnerlugit, naalakkersuisut ullumikkut ingerlappaat. Inatsisillu allanngortinneratigut Aningaasaqarnermut Kukkunersiuinermullu Ataatsimiititaliat tamakkiisumik pulasinnaanngorput, malinnaatinneqarnerulersinnaanerminnullu periarfissinneqarlutik. Taamaalilluni nakkutilliineq suli pitsaanerusumik ingerlanneqalissaaq, ammasumillu ingerlatsinissaq qularnaarneqartussanngussalluni. Assersuutigalugu Ammerivimmut:

-Ammerivimmut tunngasut annertoorujussuarmik oqallissutigineqarput, Kukkunersiuinermullu Ataatsimiititaliap soqutiginnikkuni Ammerivimmut, KNR-imut, Pilersuisumut imaluunniit Royal Greenlandimut pulasinnaanngorput. Soorunami unammilleqatigiinnermut tunngasut, aamma inunnut ataasiakkaanut tunngasut, mianerineqartussaapput, taakkulu annertuumik illersorneqartussaallutik, Hans Enoksen oqarpoq.

Inatsisissatut siunnersuut ukiut arfinillit atorlugit suliarineqarpoq.

-Ilumoorpoq suliaq piffissarujussuarmik ingerlatsiffiusimammat. Naalakkersuisut inatsisartullu allattoqarfiat suleqatigiillutik suliaq sivisuumik suliaraat, tusarniaanerparujussuillu ingerlanneqareermata, naammassigatsigulu, Inatsisartunut aatsaat saqqummiupparput. Kalluarneqartussat aamma annertummata pitsaasumik suliarerusussimavarput, Hans Enoksen naggasiivoq.

Inatsisissatut siunnersuut akuerineqassaguni ukiup nutaap aallartinnerani atuutilissaaq. Inatsisissatut siunnersuut Aningaasaqarnermut ataatsimiititaliami suliarineqaqqaassaaq, ukiamullu ataatsimiinnissami aappassaaneerneqarlunilu pingajussaaneerneqassaaq.