Namminersornerullutik oqartussat iliuuseqarput

Qilalukkat qernertat qaqortallu aammalu nannut, aarrillu pillugit uumasunik illersuiniaqatigiiffiit nalunaarusiaat uunngaannaq isigaluni suliaasoq, aalisarnermut piniarnermullu naalakkersuisup Rasmus Frederiksenip oqaatigaa.

- Soorunami uagut isitsinnik naliliissagutta isiginnittariaaserput siammasinneroqaaq, Rasmus Frederiksen, radioaviisimut allappoq.

Uumasut pineqartut sisamat piniarneqartarnerinut atatillugit, inatsisit naammaginannginnerarlugit, kiisalu uumasut taakku amerlassusaasa ilisimaneqanngimmat, inatsisit sukaterneqarnissaat uumasunik illersuiniaqatigiiffiup verdens naturfondip ujartorpaa.

Aaverniartarneq nannunniartarnerlu annikillisarneqassanersut Aalisarnermut piniarnermullu naalakkersuisup oqaatigiumanngilaa, oqarporli Namminersornerullutik Oqartussat tungaaninngaanniit angusarineqarsimasut amerlaqisut.

Taakkartugaasa ilagaat pinngortitaq pillugu inatsit nutaaq, qilalukkat qernertat qaqortallu pillugit piniarneq illersorniarlugu nalunaarut nutaaq, timmissat pillugit nalunaarut aammalu piujuaannartitsinissaq pillugu suliniut Tulugaq-mik taaguutilik.

- Sulisimannginnerarneqassagutta maannakkut imaaliinnarlugu ukiop aappaa avillugu ingerlareersuni angusagut annertoreeqaat, Rasmus Frederiksen oqarpoq.

Nannut pillugit nalunaarusiaq juunip aallaqqaataanit atuutilissaaq, pisassalli amerlassusissaat aatsaat aappagu aalajangerneqassapput.

Aalisarnermut piniarnermullu pisortaqarfimmiit, aarrit pillugit aappaagu nalunaarusiortoqalersaartoq aamma oqaatigineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat