Namminersornerullutik Oqartussat ernianik akiliisussanngortitaapput

Namminersornerullutik Oqartussat sulisoqarnerup tungaatigut eqqartuussivilersuussisoqarnerata kinguneranik angisuumik tunngaveqartumik aningaasatigut annaasaqaqqittussanngorput.
septembarip 17-at 2008 10:21

Ilinniartitsisut Kattuffiat IMAK Østre Landsretimiit nalunaarfigineqarpoq, ukiut arfinillit sinnerlugit matuma siorna Namminersornerullutik Oqartussat ataanni Kultureqarnermi, Ilinniartitaanermi, Ilisimatusarnermi, Ilageeqarnermilu Pisortaqarfimmi allaffimmi pisortaasimasup soraarsinneqarneranut atatillugu erniat akiligassat aamma suliap ingerlanneqarnerani aningaasartuutit akilerneqassasut.

Namminersornerullutik Oqartussat pillugit IMAK eqqartuussivimmut sisamanik suliakkiisariaqarsimavoq.

Kattuffik Kalaallit Nunaata eqqartuussivianiit aallaqqaammulli ilisimatinneqarpoq soraarsitsineq pineqartoq akuersaarneqarsinnaanngitsoq, allaffimmilu pisortaasimasoq ukiuni pingasuni akissarsiaqartitaasariaqartoq.

Eqqartuussut tamanna 2006-imi aalajangersaavigineqarpoq, Namminersornerullutillu Oqartussat suliamut pineqartumut tunuarterput erniallu akiligassat akilerumanngilluinnarlugit. Maannali tassa Østre Landsretip aamma Kalaallit Nunaata eqqartuussiviata erseqqissaatigaat Namminersornerullutik Oqartussat akiliisariaqassasoq.

- Suliaq pineqartoq inuttut akisusimaqaaq aammalu inuiaqatigiinnut akisusimaqaluni, tamannali 2002-mi aaqqinneqarsimasinnaagaluarpoq, IMAK-imi siulittaasoq Sivso Dorph oqarpoq.

Namminersornerullutik Oqartussat ullumikkut aamma sulisitsillaqqinnerpaajunngitsutut aamma tusaamaneqarpoq, tassami nakuusertoqarsimaneranik eqqartuussivilersuussaq ajorsassutigeqqammerpaa taamalu Perorsaasut ilinniarsimasut peqatigiiffiannut suliamik akiumaataarsimanini pillugu 100.000 koruuninik taarsiisussanngorluni.