Namminersornerullutik Oqartussat ataatsimut pisiniartalissapput
Aningaarsat 2 imal. 4 million koruunit akornanniittut ukiortaamiit sipaarneqarsinnaalissapput, Namminersornerullutik Oqartussat allaffissornikkut atortussarsiniartarnermut nutaamik politikkeqalernerata kingunerissanik. Namminersornerullutik Oqartussani suliffeqarfiit 100-it missaanniittut taama ataatsimoortumik atortussarsiniartarnermut aaqqissuussiffigineqarnissaat imminut aamma napatikkiartuaarnissamik tunngaveqartoq, aningaasaqarnermut naalakkersuisoq Josef Motzfeldt oqarpoq.
- Ukiorpanngortuni eqqartorneqartarpoq allaffissornikkut aningaasartuutit annikillisarneqassasut. Allaffissornermut ilaalluinnarput atortussat Namminersornerullutik Oqartussa suliffeqarfiutaani sinerissami tamani pisiarineqartartut, kiisalu kiffartuusinerit siunnersorteqarfinnit attartorneqartartut, Josef Motzfeldt oqarpoq.
Namminersornerullutik Oqartussani suliffeqarfiit immikkuutaarlutik atortussanik pisiniartarnerat qimanneqassaaq.
- Pisiassanik amerlanaaralugu sapinngisamik akikitsumik pisiniartarnissaq anguniarneqassaaq. Pisiniartarfigeriikkatsinnut pisiniartarfiligigassatsinnullu isumaqatigiissutissat aiulliit ukiup matuma naajartornerani isumaqatigiissutigineqarsinnaanissaat naatsorsuutigaarput, tassanilu sapinngisamik ukiunut arlalinnut ataattumik isumaqatigiissuteqartarnissaq siunertaavoq.
Akikissuseq kisimi anguniagassaanngitsoq Josef Motzfeldt erseqqissaavoq.
- Aamma pitsaassuseq, pisiallu aserortuussagaluarpata kiffartuunneqarnerit tamarmik ilanngullutik nalilersorneqassapput, Naalakkersuisunittaaq pingaartinneqarpoq pisiat sapinngisamik avatangiisinut innarliisuunnginnissaat.
Namminersornerullutik Oqartussat suliffeqarfiuterpassuini allarfissornikkut atortunik pisiniarnermut ukiumut 200 million koruunit missaat atorneqartarput.
- Taakkunannga procentit ataatsimiit marluk tikillugit sipaarutigineqarsinnaanissaat takorloorparput, tassa ukiumut 2 imal. 4 million koruunit akornanni aallaqqaammut sipaarneqarsinnaanissaat naatsorsuutigaarput.
Kommuneqarfiit allaffissornikkut sipaarniuteqarnissamut nutaamut aamma soqutiginninnissaat neriuutigigini Josef Motzfeldt oqarpoq, erseqqissaatigaluguli kommuneqarfiit namminneerlutik tamanna aalajangissarissagaat.
