Namminersornerullutik Oqartussat APK-mit eqqartuussisulersuunneqartut

Aalisariutinik Piginneqatigiiffiit Kattuffiata, APK-p, kalaallit avataasiutaatillit arfinillit sinnerlugit Namminersornerullutik Oqartussat eqqartuussisunut suliassanngortippaat, 30 mio kruuningajalluinnarnik taarsiiffigeqqullutik.

Tunngavilersuutaavoq Namminersornerullutik Oqartussat tunngaviusumik inatsimmut akerliusumik EU-mik 4000 tonsinik raajartassiisimanerat.

Matumani pineqarpoq tunngaviusumik inatsisip paragraffiisa 73-iannik unioqqutitsisimasutut unnerluutiginninneq, tassani pineqarluni piginnittussaanermik mianerinnittussaatitaaneq. Avataasiutaatillit kalaallinit pigineqartut arfinillit isumaqarput Namminersornerullutik Oqartussat paragraffi pineqartoq unioqqutissimagaat.

2003-mi junip qaammataani Namminersornerullutik Oqartussat EU-mik aalisarneq pillugu isumaqatigiissuteqareersullu. Isumaqatigiissummi nunat EU-mut ilaasortaasut kitaani 4.000 tonsinik raajarniarnissaminnut pisinnaatitaaffilerneqarput. Tamatuma kingorna aalisarnermut inatsit aamma allanngortinneqarpoq.

Tassanngaanniillu saqitsaanneq aallartippoq – kikkut-uku pisassinneqartut?

- Kalaallit kitaani raajartassaat 4000 tonsit EU-mut tunniunneqarput. Allatut iliornissatsinnut periarfissaqarsimanngilagut, naalakkersuisut taarseraappallaarnerisa kingunerisaannik, APK-p siulersuisuini siulittaasutut qinigaaqqeqqammersoq, Lars-Emil Johansen oqarpoq.