Namminersornerullutik Oqartussat Alcoalu atsioqatigiipput
Namminersornerullutik Oqartussat aluminiumillu aatsitsiviliorfissarsuarmik misissueqqaartussaq, Alcoa, Kalaallit Nunaanni aatsitsiviliornissami suleqatigiinnissamik ippassaq unnukkut atsioqatigiipput. Taanna Ilulissani pivoq, Naalakkersuisullu siulittaasuat, Hans Enoksen, Inuussutissarsiornermullu Naalakkersusoq, Siverth K. Heilmann, atsiortuullutik.
USA-p Danmarkimut aallartitaa, James P. Cain, atsioqatigiinnermi aamma najuuppoq.
- Suliami matumunnga atatillugu Kalaallit Nunaat pillugu Alcoa-p isiginneriaasia iluarisimaaqaara. Sumiiffinni tamani nunaqavissunik ilinniartitsisarneq atorfinitsissisarnerlu taama annertutigisumik ilungersuutiginiarneqarnera assut nuannaarutigaara, aamma oqaatsitta sulinermi sapinngisamik oqaaseritinniarneqarnerat nuannerluinnarpoq, Inuussutissarsiornermut Naalakkersuisoq, Siverth K. Heilmann, atsioqatigiinnermi ilaatigut taama oqarpoq. Katillugit 15 milliardi koruuninik Alcoa aningaasaliissaaq.
Kalaallit Nunaata oqaluttuarisaanerani aatsaat taama amerlatigisunik aningaasaliisoqarpoq.
Ilulissani ippassaq unnukkut atsioqatigeereernerup kingorna Kalaallit Nunaanni aatsitsiviliornissaq Alcoa-p maanna misissornialerpaa. Aatsitsivissaq ukioq 2014-imi ajornassanngippat piariissangatinneqarpoq.
Hans Enoksen aamma naammagisimaarinnipoq. Naalakkersuisut siulittaasuat ippassaq unnukkut ima oqarpoq:
- Inuiaqatigiit kalaallit pinngortitamut qanittuaannarnikuupput. Imaani nunamilu uumasut uatsinnut pingaaruteqarluinnartuupput. Qularinngilarput pinngortitamik mingutsitsinnginnissamut tunngassuteqartut aaqqiivigineqarumaartut. Qularinngilluinnarparpullu tamanna aamma Alcoakkormiut uatsitulli pingaartitaritigigaat. Siunissatsinni unamminiagassarpassuaqarpugut, kisianni piviusunngussappat qularinngilara tamannakalaallit Nunaata siunissaata qaamasuunissaanut aqqutissiuussisuussasoq, Naalakkersuisut siulittaasuat, Hans Enoksen, Ilulissani atsioqatigiinnerup kingorna oqarpoq.
