Namminersornerullutik Oqartussani atorfillit toqqissisimanngillat

Namminersornerullutik Oqartussani allaffissornerup aaqqissuuteqqinneqarnerani, atorfillit isumaqatigiissutinut sorlernut inissisimalissanerlutik ilisimanngilaat.
Allattoq Jaaku Lyberth
februaarip 27-at 2008 14:52

Allanngortiterinerup kingunerisinnaasai pillugit Atorfillit kattuffii, IMAK, ASG, AK-lu ilaasortatik pillugit Namminersornerullutik Oqartussanut saaffiginnittarnerat kinguneqarneq ajorput.

Namminersornerullutik Oqartussat iluanni atorfillit, kattuffimmi ilaasortat toqqissisimannginnerannik kinguneqarpoq, Sivso Dorph oqarpoq, massakkorpiaq oqaatigineqarsinnaanngilaq Namminersornerullutik Oqartussani aaqqissuussineq qanoq ittoq anguniarneqarnersoq, taamaallaalli pisortat atorfinitsinneqarneri kisimik ilisimaneqarpoq, atorfillilli sunik suliaqartinneqassanersut ilisimaneqanngilaq, Sivso Dorph oqarpoq.

Sivso Dorph isumaqarpoq, Namminersornerullutik Oqartussat aaqqisuuteqqinneqarnerata aallartinneraniit Kattuffiit akuutinneqarsimasariaqaraluartut.

Ilinniartitsisut Meeqqat Atuarfianneersut Kattuffiat IMAK, Atorfillit Kattuat AK, ilinniagartuullu Katuffiat ASG, ataatsimoorlutik Namminersornerullutik Oqartussanut suleqatigiinnissamik saaffiginnipput.

Namminersornerullutik Oqartussat saaffiginnissut pillugu oqaaseqartinniarsimagaluarparput iluatsinnaguli.