Namminersornerulersimasut allat naligalugit suleqataalerput

Kalaallit Nunaat, Savalimmiut Ålandilu Nunani Avannarlerni nunat allat naligalugit suleqataasinnaalerput.

Tamanna Nunani Avannarlerni suleqatigiinnermut ministerit qaammatip matuma aallartisimalernerani aalajangerpaat.

Taamaalilluni kalaallit Nunani Avannarlerni suleqatigiinnermi oqartussaaffitik naapertorlugit Nunani Avannarlermiunut allanut naligiissitaalerput.

- Nunanut allanut nammineerluta oqartussaalernissatsinnut tamanna alloriarneruvoq, nunanut allanut tunngasunut naalakkersuisoq Aleqa Hammond erseqqissaavoq.

Taassuma aamma oqaatigaa Nunani Avannarlerni suleqatigiinneq naalakkersuisut suliaannut arlalippassuarnut attuumassuteqartoq.

- Ingammik kulturimut, atuartitsinermut, ilisimatusarnermut avatangiisinullu tunngasunik suleqatigiinnermi peqataasarpugut. Naalakkersuisuni sunut tunngasut suleqataaffiginissaasa oqallisiginissaat qilanaaraara, Aleqa Hammond oqarpoq.

Ippassaq oqaluttuaraarput Savalimmiut Nunat avannarliit Siunnersuisoqatigiivinut ilaasortanngornissaa suleqatigiissitat ilaannit tunuarsimaarfigineqartoq.