Namminersornermut inatsit Danmarkimit unioqqutinneqarpoq
Tamanna pivoq aggustimi 2009-mi, Danmarkimilu naalakkersuisut kukkunerat taanna imaannaanngitsoq, Demokraatineersup Niels Thomsenip § 37 najoqqutaralugu, Ilaqutariinnut naalakkersuisumut Mimi Karlsenimut apeqquteqaatigaa.
Tassami Niels Thomsenip oqaatigaa, Naalakkersuisunut ilaasortap Mimi Karlsenip, qallunaat naalakkersuisuisa kukkunerat, ukiormanna maajimili ilisimasilersimagaa, Inatsisartulli ilisimatissimanagit.
Inatsisartut septembarip naanerani aatsaat ilisimatinneqarput, taamaattumillu Niels Thomsenip paaserusuppaa, pineqartoq sooq ilisimalerniariarlugu Mimi Karlsennip, Inatsisartut ilisimatissimannginnerai.
- Isumaqartoqarsinnaagaluarpoq, pisoq taama ilungersunartigisoq pissutissaqalersitsisimasariaqaraluartoq Inatsisartunut paasisitsinissamut minnerpaamilluunniit ataatsimiititaliamut susassaqartumut, Niels Thomsen allappoq.
Ingammik Inatsisartut Innarluutillit pillugit isumaqatigiissutip Kalaallit Nunaannut atuuttussaanera pillugu oqallimmata, taamanikkut Isumaginninnermut Naalakkersuisup, Maliina Abelsenip, eqqunngitsumik paasisitsisimanera pissutigalugu.
- Taamani naalakkersuisuusup ilisimasimassanngilaa, paasissutissat Inatsisartunut apuunneqartut kukkusuusut. Kisiannili Naalakkersuisut kingusinnerusukkut ilisimalerunikku, Inatsisartut kukkusumik paasitinneqarsimasut, taava Naalakkersuisut pisussaapput paasissutissiissutit sukkanerpaamik aaqqissallugit, Niels Thomsen § 37 najoqqutaralugu Mimi Karlsenimut apeqquteqaammini tikkuaavoq.