Namminersornermut apeqqut utoqqaat qanoq isumaqarfigaat?

Magnus Therkelsen, KGH-qarallarmat pisiniarfimmi allaffimmilu ilinniartuullunilu sulisuusimavoq, aamma niuertorusiusimalluni. Qallunaat kalaallillu assigiinngisinneqartarnerat suli ullormanna takussaanerarpaa.

- Assersuutigiinnarlugu uagut sulinitsinni tikisitanik takkuttoqartarpoq, taakkulu sulinissamut ima piareersimanngitsigisarput, uagut tassaasariaqartarluta - pissusissamisoortumik sulinissaanut ilinniartitsisut. Pisinnaanngoraangamik tassaasarput uatsinnut qullersanngortut, Magnus Therkelsen nassuiaavoq.

Tikisitat kalaallinut naleqqiullutik annerungaartumik akissarsiaqartinneqartarnerat, naak Kalaallit Nunaanni sulisinnaanngornissaat tikillugu kalaallinit ilinniartitarineqaraluarlutik.

Magnus Therkelsen oqarpoq assigiinngitsineq Namminersornerullutik Oqartussat atuutileraluarmataluunniit suli ullormannamut atuuttoq.

- Akissarsiat eqqaassagaanni suli atuuppoq. Ajuusaarnaraluartumik suli inunngorsimaneq tunngavigalugu akissaasersuineq ingerlanneqarpoq. Kisianni isumaqarpunga namminersulerutta uagut nammineq – kalaallisut isumarput tunngavigalugu – aaqqeeriarsinnaalissasugut, Magnus Therkelsen isumaqarpoq.

Alloriarnissarlu pinngitsoornagu kalaallit Namminersornermut angerunik angusussaagaat oqaatigaa.

- Soorunami ullumikkut ajornartorsiuteqarpugut annertugisassaasunik, kisianni taakkua uniffigiinnarlugit namminersonermut itigartitsissagaluarutta tassaniittuartussaavugut, qaquguujumaarnersumut.