Namminersorneq tamaviaarullugu paasititsiniutigineqalissaaq

Taamalu Kalaallit Nunaanni namminersornerup atuutsinneqalernissaa anguniarlugu innuttaasunik novembarip 25-iani taasisitsinissamut inatsisissatut siunnersuut suliarineqartussanngussalluni.

Isumaliutissiissutip persuarsiorpalaartumik tunniunneqarnera Katuap inersuaaraani pissaaq, taamalu isumalioqatigiissitap siulittaasoqarfiani siulittaasoq Jonathan Motzfeldt aammalu siulittaasup tullia Christian Mejdahl oqalugiassallutik. Persuarsiorneq Katuami tamanut ammatinneqassaaq taamatuttaaq kaffillertoqarlunilu erinarsortoqassasoq oqaatigineqarpoq.

Namminersorneq pillugu TV-kkut aallakaatitassiat sisamat suliarineqassapput aggustimiit novembarip tungaanut qaammatikkaartumik aallakaatinneqartassallutik. Taamatuttaaq TV-kkut radiokkullu takutitassiaaqqat tusarnaagassiaaqqallu suliarineqassasut unnersiutigineqarpoq.