Namminersorneq pillugu tusarniaanissaq kinguartippaat
Apeqquteqaateqarluni oqallinnissamik siunnersuuteqaqataasup Juliane Henningsenip Inuit Ataqatigiinneersup oqallinnissaq piffissaligaanngitsumut kinguartissasoq kissaatigaa. Tassani oqallinnissaagaluarmi nunanut allanut ministerip Lene Espersenip nassuiartussaagaluarpaa namminersornerup eqqunneqarnerata kingorna Kalaallit Nunaata Danmarkillu akornanni suleqatigiinneq.
Issittorli pillugu politikkimi siunniussat aalajangersarneqartussaammata Juliane Henningsen isummerpoq oqallinnissaagaluaq piffissaligaanngitsumut kinguartinneqassasoq.
Nunanut allanut ministeriaqarfiup maajimi saqqummiuttussaavaa issittoq pillugu pilersaarut nutaaq Savalimmiut, Kalaallit Nunaat Danmarkilu tassani tunulequtaassallutik. Tassani pilersaarummi erseqqissarneqassapput issittoq pillugu siunissamut pilersaarutit. Tamakkulu aalajangersarneqarniarnerisa akornusinnginnissaa Juliane Henningsenip pingaartissimavaa.
Atlantikup avannaani suleqatigiit nalunaarput issittoq pillugu pilersaarut saqqummiunneqareermat oqallinnissamut tunngavissaqarnerulissasoq.
Oqallinnissaq pillugu kissaateqartut tassaapput Juliane Henningsen, Mogens Jensen Socialdemokratineersoq, Kresten Touborg SFimeersoq, Niels Helveg Petersen Radikalineersoq, Enhedslistenimeersoq Line Barfod, Høgni Hoydal Savalimmiuneersoq, Pia Chrismas Møller aamma Christian H. Hansen Attaviitsoq.
