Namminersorneq pillugu taasisitsisuusaarnermi amerlanerussuteqartut akuersaarput
68-it akuersillutik taasipput, 39-it akerliusut pingasullu taasiffigineqaratik.
Namminersorneq pillugu isumalioqatigiissitami ilaasortat, naalakkersuinermik suliallit, sulisitsisullu kattuffii Namminersorneq pillugu ullaap tungaani akunnerit marluk sinnerlugit Niuernermik ilinniarfimmi oqallipput.
Oqallitsitsineq sioqqullugu, kingornalu naammassimmat Ilinniartut marluk oqaluuppagagut.
Niuernermik ilinniarfimmi ilinniartoq radioavisimit oqaloqatigisarput siulleq isumaqarpoq, Kalaallit Nunaat namminersornissaminut piareersimanngitsoq aningaasaqarneq eqqarsaatigalugu. Kalaaallit Nunaat sanaartornerup tungaanut piareersimanngilaq. Eqqartuussiveqarneq politeeqarnerlu akissaqarfiginngilagut, Niuernermik Ilinniarfimmi Nuummiittumi ilinniartoq oqarpoq.
Namminersornermut naamiissaguni ingerlaqqinnissamut kivitseqataanaviarnani oqarpoq, angissagunilu kivitseqataassanerarpoq.
Isummani paatippai, pisullu malinnaavigeererunigit aalajangivinniarluni oqarpoq.
Adolfine Jonathansen Namminersornissamut angertuuvoq, taanna isumaqarpoq Kalaallit Nunaat alloriartariaqartoq tamannalu maannakkut piffissaasoq. Kalaallit Nunaat allorianngippat uninngaannassaaq. Taasisitsinerup kingorna allorariarneqareerpat tassani takuneqassaaq qanoq siuariarsimanersugut, Adolfine Jonathansen oqarpoq.
Namminersorneq pillugu oqallinneq Nuummi Niuernermut Ilinniarfimmi ingerlanneqarmat, ilinniartut arlallit ilinniartut atugaat pillugit apeqquteqarput. Namminersorneq pillugu isumalioqatigiissitami ilaasortat nassuiaapput, ilinniartitaaneq Namminersornerullutik Oqartussat ataani inissisimasoq, Namminersornermullu tunngassuteqanngitsoq. Tamanna Adolfine Jonathansenip isumaanut allannguinngilaq, Namminersorneq pillugu taasisitsinissamut angerniarluni oqarpoq.
