Namminersorneq pillugu taasisitsineq aallartiinnaqaaq
Ullumi marlunngorneruvoq novembarip 25-at – ulloq nunatsinni oqaluttuarisaanermut pingaaruteqalersinnaasoq. Namminersorneq pillugu taasisitsineq nunarput tamakkerlugu ullaaq nalunaaqutaq qulingiluanut ammarneqarpoq – taamaattorli arlalissuit allakkatigut taasereersimapput.
Allattoq Louise M. Kleemann
- Maannamut allakkatigut taasinerit 300-t sinneqartut tigoreerpavut, Gerda Knudsen Nuup Kommuniani allaffeqarfiup pisortaa oqarpoq.
Allakkatigulli taasinerit qasserpiaanersut maanna oqaatigineqarsinnaanngilaq. Tassami ullup ingerlanerani allakkatigut taasinerit takkussortut aamma ilanngunneqartussaammata. Allakkatigut taasinerit taasisitsinermi ilaassagunik, unnugu arfineq pingasunngortinnagu tiguneqareersimassapput. Maani nutaarsiassaqartitsivimmiit taasiartorluarnissassinnik kissaassivugut.