Namminersorneq pillugu suliaq kigaappallaarnerarpaat

Namminersorneq pillugu isumalioqatigiissitat suliaat nunatta ilaasortaatitaasa ilaannit kigaappallaarsorineqarpoq, pingaartumik aningaasarsiorneq pillugu suleqatigiissitaliami suliniarneq kigaappallaarsorineqarluni. Ilaasortat Danmarkimeersut ilaat suliaminnik pingaartitsinngippallaarsorineqarput, nunatta ilaasortaatitaasa ilaat Kuupik Kleist, Inuit Ataqatigiinneersoq oqarpoq:

- Imaassimasinnaavoq qallunaat imaluunniit Danmarkip tungaaniit isigalugu ataatsimiititaliarsuarmi sulineq Danmarkip siunissaanut pingaaruteqarpianngitsoq, kisianni inuiaqatigiinnut kalaallinut nunatsinnullu ataatsimut isigalugu pingaaruteqaqaaq siunissami aaqqissuussineq qanoq uagutsinnut ittuussanersoq aamma Danmarkimut attaveqarnitta qanoq iluseqarnissaa, Kuupik Kleist aningaasarsiorneq pillugu suleqatigiissitaliami ilaasortaasoq oqarpoq. Kuupik Kleistip ilanngullugu erseqqissaatigaa Danmarkip naalagaaffiata siunissaa ataatsimut isigalugu uani pineqartoq, Kalaallit Nunaata siunissaannaanngitsoq.

Suleqatigiissitaliami Demokraatit ilaasortaatitaat Per Berthelsen isornartorsiuisumut isumaqataavoq, erseqqissaatigaluguli peqqissaartumik suliaq ingerlassappat naammassinissaanut ulluliinissaq pingaarnerpaajunngitsoq:

- Kuupik Kleistip isornartorsiuinermini aallaavigippagu ataatsimiinnissamut pilersaarusiat malikkuminaannerujussuat, taamaaliornikkullu suliassamik salliutitsinerup qaffasippallaannginneranik immaqa takutitsisinnaaneq maalaarutaappat, taava isumaqatigisinnaavara, kisianni oqaluuserisassat ima pingaaruteqartigisut imatullu sunniuteqartussaatigisut isumaqarpunga naammassinissaq ullulereerlugu ingerlanissarput aallaaviussanngitsoq, Per Berthelsen erseqqissaavoq.

Namminersorneq pillugu isumalioqatigiissitaliami aningaasarsiorneq pillugu suleqatigiissitaliat maajip ingerlanerani ataatsimiissaapput. Nunatta suleqatigiissitaliami ilaasortaatitaat taamaasillutik inatsisartut upernaajunerani ataatsimiinnerata nalaani Danmarkimut ataatsimiigiartariaqalissapput.