Namminersorneq pillugu suliallit piisaarsimasut
2004-miit 2008-mut isumalioqatigiissitaq nunatsinnut angalagaangat bilitsinut akisunernut aningaasat atorneqartarsimasut annertuallaarneri isornartorsiuinermut pissutaapput.
Pisortani sulisut angalagaangamik bilitsit naliginnaasut atortarpaat, taakkualu malinnagit isumalioqatigiissitami ilaasortat nunatsinnut angalagaangamik akisunerniittarsimapput. Isumalioqatigiissitap naatsorsuutaanni DR Nyheder-ip paasisimasaanni tamanna takuneqarsinnaavoq.
Ingerlatsilluarnerunngilaq inuiaqatigiilerinermut ilisimatooq Bent Greve oqarpoq:
- Bilitsit akisunerit atorlugit angalasoqartuarsinnaanngilaq. Akikinnerpaaq atorlugu angalasarnissamut tamanna akerliuvoq, Bent Greve DR-imut oqarpoq.
Namminersorneq pillugu isumalioqatigiissitaq folketingimi ilaasortanik aamma ilaasortaatitaqarpoq, taakkulu ilaasa akisunerni angalasarnertik eqqumiigisarsimavaat.
- Angalaneq nalunaaquttap akunnerinik sisamaannarnik sivisussuseqarpoq taamaattumillu akisunermi angalasarsimaneq isornartorsiorneqarluni. Tamanna pisariaqanngikkaluarpoq, Per Ørum Jørgensen Kristendemokratineersoq angalanernut ilaasarsimasoq oqarpoq.
Namminersorneq pillugu isumalioqatigiissitaq pillugu isornartorsiuineq unnugu nalunaaqutaq qulingiluanut TV-avisimi KNR-ikkut aallakaatinneqartussami isiginnaarneqarsinnaavoq.
