Namminersorneq pillugu paasisitsiniaasoqalerpoq

Namminersorneq pillugu ukioq manna novembarip ulluisa 25-anni innuttaasut taasitinneqarnissaat Naalakkersuisut aalajangiusimavaat. Innuttaasulli taasitinneqannginneranni Namminersulernissaq pillugu paasititsiniaasoqassaaq. Namminersorneq pillugu allattoqarfimmit taama neriorsuisoqarpoq.
Allattoq Mads Lynge
apriilip 22-at 2008 16:55

Namminersorneq pillugu Allattoqarfik Naalakkersuisut siulittaasuata Hans Enoksenip allattoqarfiata ataani inissisimavoq, Namminersornerlu pillugu Isumalioqatigiissitap isumaliutissiissutaa Hans Enoksenimut maajip ulluisa arfernanni tunniunneqareerpat, paasisitsiniaaneq aallartissaaq.

Isumaliutissiissummik tunniussineq Katuamiit KNR-TV-kkut toqqaannartumik aallakaatinneqassaaq.

Isumaliutissiissummik eqikkaasoqaleruttorpoq, inoqutigiinnullu agguaanneqassalluni. Tamanna aasartinnagu naammassereersimassasoq, Namminersorneq pillugu Allattoqarfik neriorsuivoq.

Taamaalisoqareerpat Namminersorneq pillugu inatsisissap ilusissaa siunnersuutigineqassaaq, siunnersuullu innuttaasunut aamma agguaanneqassalluni.

Innuttaasoq siunnersuummut nammineq isummersinnaanngussaaq peqataatinneqassallunilu.

Innuttaasunut paasisitsiniaatigaluni ataatsimiititseqattaarnerit aasami sulinngiffeqareeernerup kingorna aallartinneqassapput.

Naalakkersuisut ataatsimiisitseqattaassapput, inatsisartunut ilaasortat Namminersornerullutillu Oqartussani atorfillit peqataasassallutik.

Innuttaasut oqallinnermut peqataatinneqassapput, illoqarfiillu nunaqarfiillu tamarmik tikinneqarnissaat siunniunneqartoq, Namminersorneq pillugu Allattoqarfik neriorsuivoq.