Namminersorneq pillugu isumalioqatigiissut kinguaattooqqippoq
Namminersorneq pillugu isumalioqatigiissitaq Namminersornerullutik Oqartussat ukiunik 25-inngortorsiormata 2004-mi aallartinneqarpoq.
Pilersaarut malillugu namminersorneq pillugu nalunaarusiamik sukumiisumik isumalioqatigiissitaq septembarimi 2006-imi tunniussisussaagaluarpoq.
Oqaannarnerli ajornaqaaq. Namminersorneq pillugu isumalioqatigiissitaq danskinit kalaallinillu ilaasortaaffigineqartoq arlaleriarluni unittoortarpoq.
Maannalu ukiut aappaata avinnera killigititaasup siulliup tikileraa kinguaattooqqittoqalerunarpoq. Isumalioqatigiissitaq qaammammi uani naammassisussatut januaarimi kingullermik nalunaarutigineqarpoq.
Isumalioqatigiissitamili ilaasortap Per Ørum Jørgensenip Konservative Folkepartiineersup minnerpaamik ataatsimiinnerit pingasut naammassitinnani ingerlanneqarnissaat naatsorsuutigaa.
-Suli ataatsimiigiaqqussummik tigusaqanngilagut, aningaasarsiorneq pillugu ataatsimiitsitaliami aningaasat tapiissutigineqartartut pillugit aamma uuliamit isertitassat agguataarneqarnissaat suli oqallisigineqaqqittussaavoq, Per Ørum Jørgensen oqarpoq.
Inuiattut oqartussaaneq pillugu ataatsimiitsitaliami aamma ataatsimiinneq ataaseq amigaatigineqarpoq kiisalu isumalioqatigiissitap tamarmiusup ataatsimiinnissaa aamma amigaataasoq, Per Ørum Jørgensenip oqaatigaa.
Marsimi isumaqatigiissutigineqarpoq uuliamit isertitanit sinneqartoorutit siulliitt 75 millioni koruunit kalaallit tigummiinnassagaat. Taakku sinnerneqarpata isertitat Kalaallit Nunaata Danmarkillu assigiimmik avinnissaat isumaqatigiissutigineqarpoq.
