Namminersorneq pillugu isumalioqatigiissitat ataatsimiissapput
Namminersorneq pillugu Isumalioqatigiissitat Københavnimi unnugu ataatsimiissapput. Ataatsimiinissami suleqatigiissitat marluk; tassa Aningaasarsiornermut Inuusssutissarsiutinillu Ineriartortitsinermut kiisalu Inatsisinik tunngaviusunik inatsisinullu inuiaat akornanni atuuttunut tunngasunik sammisaqartut, sulinerminni killiffitsik nalunaarutigissavaat. Oqaluuserineqartussat pillugit Namminersorneq pillugu isumalioqatigiissitat allaffeqarfianni pisortaq Jakob Janussen ima oqarpoq:
- Namminersorneq pillugu inatsisissamut atatillugu, nunanullu allanut tunngasuni nunatsinnullu kalluaasuni apeqqutit oqaluuserineqassapput, tassa nunanut allanut tunngasunut apeqqutini nunarput qulaatiinnarlugu aalajangertoqartannginnissaa aalajangersagassami qularnaarniarneqassaaq. Jakob Janussenip arfanniartarnermut ataatsimiititaliarsuarmi nunarput sinnerlugu danskit isummertartuunerat assersuutigaa.
Piffissami kingullermi nunatsinni uuliaqassappat, taamaattoqassappallu aningaasartaasa sumut tutsinneqartarnissaat, oqaluuserineqartorujussuuvoq, tamannalu Isumalioqatigiissitat ataatsimiinneranni unnugu tikinneqanngitsoornaviarunanngitsoq Jakob Janussen oqarpoq.
Isumalioqatigiissitap Aningaasarsiornermut Inuussutissarsiutinillu Ineriartortitsinermut tunngasunik suleqatissitaa, ilaatigut Danmarkip nunatsinnut ukiumoortumik aningaasaliissutigisartagaanut tunngasunik sammisaqartuuvoq, kiisalu Inatsisinik tunngaviusunik aammalu inatsisinut inuiaat akornanni atuuttunut suleqatigissitaq ilaatigut inuiaat kalaallit oqartussaaqataaneranut tungasunik sammisaqartuulluni.
