Namminersorneq pillugu isumalioqatigiissitaq tamaviaarnerusariaqartoq

Namminersorneq pillugu isumalioqatigiissitani suleqatigiissitaliat ilaat kigaappallaamik sulinerarlugit ilaasortat Kuupik Kleistip Per Berthelsenillu uparuaatigaat, tamannalu isumalioqatigiissitaliami siulittaasup Jonathan Motzfeldtip assortorsinnaannginnerarpaa, erseqqissaatigaali ilaasortat suliaminnik pingaartitsimmata:

- Pingaartitsisoqarpoq. Malugisarpara kalaallit qallunaallu tassani sulisut suliassaminnik pingaartitsisut aamma naammassisaqarusullutik ingerlasut, kisianni nalunngilarput Christiansborgimi qanoq ittumik politikkikkut pisoqaraangat aallarnissat allallu tamarmik akornuserneqartarmata, tamannali suliassamut ingerlalluartumut akornutaasariaqanngilaq. Ukiup ataatsip missaa qaangiuppat isumaliutissiissummik tunniussisussaavugut, Jonathan Motzfeldt oqarpoq.

Jonathan Motzfeldtip ilanngullugu oqaatigaa siulittaasoqarfiup tungaaninngaanniit ukiup matuma sinnerani aappaagulu sukateriniartoqarsinnaassasoq, ataatsimiinnerit piffissaliussani ingerlanneqartarnissaat angujumallugu, kiisalu ilaasortat tamarmiullutik peqataasalernissaat angujumallugu.

Naalagaaffiup nunatsinnut ataatsimoortumik tapiissutigisartagaasa siunissami qanoq ilusilerneqarnissaat aningaasarsiorneq pillugu suleqatigiissitaliami oqallisigineqartartunut ilaapput, taamalu suleqatigiissitaliap pingaaruteqassusiata qitiunera erseqqissaatigineqarpoq.

Namminersorneq pillugu isumalioqatigiissitaliat siulittaasoqarfiat ukioq manna juunip qaammataani Narsami ataatsimiissapput, Jonathan Motzfeldtillu neriuutigaa ataatsimiinnernik kinguartitseqattaarsimanerit siornatigut pisarsimasut kinguneqarnerlutsitsissanngitsut:

- Neriuutiginngilara kinguneqarnerlussasoq imaalilluni suliassatta kinguartinneqartariaqalerneranik. Suliassap naammassineqarnissaa eqqarsaatigalugu Folketingip siulittaasua Christian Mejdahl peqatigalugu eqqartussavarput, Jonathan Motzfeldt naggasiivoq.