Namminersorneq pillugu inatsit akuersissutigineqarpoq
- Qilanaarisarput kiisami nallerpoq. Ukiorpassuanngortuni anguniarsimasarput kiisami piviusunngorpoq. Nunatta oqaluttuarisaanerani ullumi ulloq aamma puigugassarinngisatsinnik pingaartuuvoq. Inuiaat kalaallit iluunngarluni qamannga pisumik pilluangaaritsi. Inuiattut akuerisaavugut, tamanna nunat tamat inatsisaat naapertorlugu pinngisaannarsimavoq – massakkut piviusuulerpoq. Tamatumalu malitsigisaanik nunap pisuussutaanut tamanut piginnittunngortussanngorpugut oqaatsivullu pisortatigoortumik oqaasinngortussanngorput, 21. juni 2009 inatsisip pisortatigoortumik atuutitinneqalerneraniit. Pinngitsoorumanngilanga ullormi matumani inatsisip pivisunngortinneqarnissaa anguniarlugu suleqataasimasorpassuit qamannga pisumik pilluaqqussallugit. Qujanarsuaq aqqutissiuusseqataasimanissinnut, taama Naalakkersuisut siulittaasuat Hans Enoksen Namminersorneq pillugu inatsisip akuerineqarneranut atatillugu oqaaseqarpoq.