Namminersorneq pillugu avissaartuuttoqarpoq

Allattoq Carla Davidsen
septembarip 07-at 2005 08:20

Namminersorneq pillugu ataatsimiititaliaq Danmarkimi aqagu ataatsimiissaaq. Tamanna suli pinngitsoq avissaartuunneq aallartereerpoq. Ataatsimiititaliap ilaatigut oqaluuserissavai inuit pisinnaatitaaffiinut tunngasut. Lars-Emil Johansen ataatsimiititaliami tassani siulittaasuuvoq. Lars-Emil Johansen ataatsimiititaliami siusinnerusukkut aalassassimaartitsisarsimavoq, ataatsimiititaliamiit tunuarnissani sioorasaarutigisarsimallugu, immikkut ilisimasallit ataatsimititaliamut attuumassuteqalernissaat siunertaralugu.

Akerleriissutaalersoq tassaavoq ”Naqisimaneqanngitsumik naalagaaffeqatigiinneq” – ”Free Association”. Lars-Emil Johansen isumaqarpoq, ”Naqisimaneqanngitsumik naalagaaffeqatigiinneq” suleqatigiissitaliami oqaluuserineqassasoq.

IA-miit Aqqaluk Lynge-p Atassummiillu Augusta Sallingip siulittaasoqarfimmut allakkatigut qinnutigisimavaat ”Naqisimaneqanngitsumik Naalagaaffeqatigiinneq” oqaluuserineqassanngitsoq.

Tamannali Lars-Emil Johansen-ip isumaqatiginngilluinnarpaa, oqarluni, Kalaallit Nunaata Danmarkillu suleqatigiinnerat ammasumik oqaluuserisinnaannginneripput sumiluunniit allassimanngilaq.

Ataatsimiititaliaq Danmarkip nalunaaqutaa malillugu nalunaaqutaq qulinut ataatsimiilerpoq. Ataatsimiinnerlu naammassitinnagu Aqqaluk Lynge oqaaseqarumanngikkallarpoq.