Namminersorneq pillugu ataatsimiititaliarsuup siulittaasua iluarisimaarinnippoq
Aningaasaqarneq inuutissarsiutillu pillugit suleqatigiissitap innersuussutai Namminersorneq pillugu ataatsimiititaliarsuarmi ullumi ataatsimiinnermi ilassilluarneqarput.
Aamma suleqatigiissitat isumaqatigiillutik innersuussinerat ataatsimiititaliarsuup sulineranut sunniuteqarpoq.
Taama isumaqarpoq namminersorneq pillugu ataatsimiititaliarsuarmut ilaasortaq Frank Jensen, Danmarkimi nunatsinnilu naalakkersuisunut innersuussutissamik suliaqarnerminnik naammassinneqqammersoq:
- Ataatsimiititaliarsuarmi sulinitsinni pingaarutilimmik pisoqarpoq. Tassami ataatsimiititaliarsuarmit danskit aamma kalaallit naalakkersuisuinut isumaqatigiilluta aningaasaqarnermut tunngasunik, inuussutissarsiornermut, tapiissutinut ataatsimoortunut tunngasunik aamma suliassanut suli Kalaallit Nunaannut nuunneqanngitsunut tunngasunik innersuussuteqarsinnaaleratta.
Ullumikkut ulloq nuannersuuvoq uangalu suleqatigiissitamut siulittaasutut nuannaarutigaara kalaallit partiivi tamarmik danskillu partiivi tamangajammik, Dansk Folkeparti kisiat pinnagu, isumaqatigiissuteqarsinnaagatta.
Tamanna ataatsimiititaliarsuarmut qanoq sunniuteqarnersoq aperineqarami Frank Jensen akivoq,
Ataatsimiititaliarsuarmi suleqatigiinnermut pitsaanerulersitsisoq. Siusinnerusukkummi pasinapiluttunik pissuseqarluta immitsinnut qiviaqattaattaraluarpugut, maannali ataatsimoorluta Kalaallit Nunaata namminersornerunermit namminersornermut ikaarsaariarnissaa suliassaralutigu isumaqatigiissutigaarput.
Maanna tamatta misigisimavugut suliassarput septembarimi naammassisinnaassallutigu. Aningaasaqarnermut tunngasut isumaqatigiissutigineqarnerat ataatsimiititaliarsuup sulineranut sunniuteqarpoq. Suliassallu naammassisinnaanera upperinerulerparput, Frank Jensen oqarpoq.
Namminersorneq pillugu ataatsimiititaliarsuaq tullianik juuni qiteqquppat Tasiilami ataatsimiissaaq. Taamanikkut suleqatigiissitaq naalagaaffittut inuiattullu pisinnaatitaaffiit pillugit innersuussutiminik saqqummiussissaaq. Namminersorneq pillugu ataatsimiititaliarsuup Danmarkimi nunatsinnilu naalakkersuisunut innersuussutaat tamarmiusut septembarip 13-anni Katuami tamanut saqqummiunneqassapput.
