Namminersorneq pillugu ataatsimiititaliaq ataatsimiilerpoq

Namminersorneq pillugu ataatsimiititaliaq Sisimiuni aqagu ataatsimiilluni aallartissaaq. Nunatsinni Danmarkimilu naalakkersuisut nunanut allanut sillimaniarnermullu tunngasuni suleqatigiinnerat, siunissamilu namminersornerup ataani tamatuma qanoq inissisimanissaa, pingaarnertut oqaluuserineqassapput.

Namminersorneq pillugu ataatsimiititaliami siulittaasunngoqqammersoq Siumuminngaanneersoq Jonathan Motzfeldt oqarpoq, nunatta namminersortunngoruni nunanut allanut sillimaniarnermullu tunngasunut annertunerpaamik oqartussaaffeqalernissaata qularnaarniarneqarnissaa anguniarneqarmat, tamanna ataatimiinnissami pingaarnertut oqaluuserineqassasoq.

-Pingaaruteqarpoq namminersornerup ataani ingerlalernissatsinni nunatta annertunerpaamik oqartussaanerata qularnaarnissaa. Tassani maannamut pisinnaatitaaffiit qanoq agguaassimaneri ilaatigut inatsisini aamma tunngaveqarlutik siunissami aaqqinneqartussaammata. Taakku nalorninaatsumik inissisimaneri aqagu ataatsimiinnermi oqallisigineqarlutik nanginneqartussaapput. Tassani uagutsinnut pingaaruteqarpoq, uagutsinnut nunatta ukiuni kingullerni nunanut allanut tunngatillugu, inissisimanermigut nukittorsarsimanera tunngavigalugu pitsaasumik siunnersuummik inissiiniarnissarput. Taamaammat pissanganarpoq aqagu oqallinnerit qanoq kinguneqarumaarneri, Jonathan Motzfeldt oqarpoq.

Jonathan Motzfeldt-ip neriuutigaa apeqqutit nalorninaatsumik nunatsinnut Danmarkimullu siunnersuusiorlugit inerneqassasut.

-Takusinnaasakka najoqqutaralugit maannakkut uagut nammineq nunanut allanut tunngasutigut allattoqarfipput, aammalu Danmarkimi Udenrigsministeriaqarfiup pappiaraliarisimasai najoqqutaralugit qiviassagaanni, tamarmik illugiillutik piumassuseqarput taakku apeqqutit nalorninaatsumik nunatsinnut aamma Danmarkimut siunnersuusiorlugit inerneqarnissaat. Ukioq ataaseq qaangiuppat naammassisinnaanissarput anguneqassappat, tamakkunatigut aamma nalorninartut tamaasa peersimaniassagatsigit. Taamaalilluta aamma inatsisartut folketingillu aalajangiiniarnissaminni nalornissuteqaratik qanoq ilillutik suliarineqarsimasut ilisimaniassammatigit, Jonathan Motzfeldt oqarpoq.

Nunanut allanut sillimaniarnermullu tunngasutigut suleqatigiinnerup ataatsimiissutigineqarnerata saniatigut aningaasaqarnermut, inuussutissarsiornermut, naalagaaffeqatigiinnermut, nunallu akornanni immikkut pisinnaatitaaffiinnut tunngasut, kiisalu namminersulernissamut atatillugu apeqqutit sulisoqarnermut tunngasut ataatsimiititaliat siulittaasuinit saqqummiunneqassapput.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat