Namminersorneq angerneqarpat aningaasarpassuit kalaallit annaassavaat
Namminersorneq pillugu Kalaallit Nunaata Danmarkillu isumaqatigiissutaat tunngavimmigut Kalaallit Nunaata namminersulivinnissaanut ikaarsaariarfiusussaagaluaq, professorip Danmarkip Kalaallit Nunaatalu akornanni qilersuisuuginnarsinnaasoraa.
- Akisussaaffiit Kalaallit Nunaata Danmarkimit tigooqqakkani nammineq aningaasalersortussaavai, ullumikkutullu Namminersornerullutik Oqartussaqarnermi akisussaaffinnik tigooqqaanertut ittussaanani. Christen Sørensen oqarpoq.
Akisussaaffiit Namminersornerullutik Oqartussat ullumikkut tiguneqaangatigit Danmarkimit aningaasanik malitseqartinneqartarput, akisussaaffiit ingerlanneqarnerannut aningaasartuutit amerlaqataannik ukiumut tapiissutit ilaneqartarlutik.
Tamannalu Namminersornermi ajornassaaq. Kalaallit Nunaata nammineq aningaasalersorsinnaasani tigooqqartussaavai. Taamaattumik Namminersorneq atuutilerpat ukiuni siullerni tallimani akisussaaffiit arlaannaalluunniit Kalaallit Nunaannit tiguneqarsinnaasorinngilaa.
- Oqaluuserineqarsinnaavoq nuna sorleq pilliuteqarnerpaassanersoq, Danmarki imaluunniit Kalaallit Nunaat. Isumaqarpunga Namminersorneq eqqunneqarpat kalaallit iluanaarnerussasut, namminnermi qaqugu akisussaaffiit tigussanerlugit aalajangersinnaagamikku, Christen Sørensen oqarpoq. Namminersorneq pillugu novembarip ulluisa 25-ianni taasisitsisoqassaaq.
