Namminersorneq?

Inatsisartut ukiaanerani ataatsimiinnerat ammarlugu Naalakkersuisut siulittaasuata oqariartuutaa, juunip ulluisa 21-anni 2009-mi namminersorneq Kalallit Nunaanni atuutilissasoq, innuttaasunit assigiinngitsumik isummerfigineqarpoq.

- Tupaallannarpoq taama sukkatigisumik pisinnaanngitsoraara. Tusarakku upperinngikkaluarparaluunnit. Nukingiussaanngitsumik namminersulivissagutta ukiut 15-20-t qaangiuppata atsaat pisinnaassasoraara, Lutti Knudsen oqarpoq.

- Qaninaangajappara, kisianni aamma ajorinngilara. Tassa oqariartuutit tulleriaarneqarnerisa, soorlu siulleq tassaanngaannaasarujussuaq periarluni taava tullianut ingerlaqqinneq, ajunngilaq, Elisabeth Ilíngivákêq Anthonsen isumaqarpoq.

- Uanga isumaqarpunga siusippallaaluatsiartoq, innuttaasugut namminersornissamut tamakkiisumik suli nassuiaanneqanngilagut. Paatsuungasorujussuuvugut, soorlu nunaqarfimmiuusugut ersarissumik paasitinneqarsimanngilagut namminersornissaq sukkut oqimaatsumik nammataqassanersoq imaluunniit suut aqqutigissaneraat erseqqissumik paasinikuunngilarput, tassa imaammat Naalakkersuisunit qinikkanilluunniit uagut nunaqarfimmiuusugut tikinneqarneq ajornerput qanimut, tusagassiuutitigut annerusumik tusartarlugit taanna maalaarutigisaratsigu.

Isumaqarpunga ukiut qulit tungaanut suli utaqqisariaqartugut. Suli piareersimanngilagut uagut kalaallit namminersornissatsinnut, Sofus Efraimsen nassuiaavoq.