Namminersorlutik Oqartussat SIK-lu sivisuumik isumaqatigiinniarnerit kiisami naammassigaat
Inaarutaasumik isumaqatigiissut nutaaq ukioq ataaseq sinnerlugu isumaqatiginninniutigineqareersorlu atsiorneqarmat SIK-mi ilaasortanut Namminersorlutik Oqartussat suliffeqarfiutaanni sulisunut isumaqatigiissut nutaaq pillugu sivisuumik isumaqatigiinniarnerit decembarip ulluisa aappaanni kiisami naammassipput.
Isumaqatigiissut nutaaq naapertorlugu Namminersorlutik Oqartussani suliaqarfinni assigiinngitsuni 17-ini sulisut - ilaatigut qatserisartut, ullukkut paaqqinnittarfinni sulisut aamma peqqinnissami ikiortit - akunnermusiaat 2,20 koruuninik ukiut tamaasa qaffanneqartassapput.
Isumaqatigiinniarnertik sivisunaarsimagitsik, SIK-p Namminersorlutik Oqartussallu nassuerutigaat.
- Suliaqarfinni assigiinngitsuni 17-ini sulisut pillugit isumaqatigiinniarnerit naammassiuminaassinnaasarput, SIK-lu inuiaqatigiit nammassinnaasaannit ilaannikkut annerusumik isumalluarsinnaasarpoq, taamakkaluartoq isumaqatigiinniarnerit naammassilluarput, Aningaasaqarnermut Sulisoqarnermullu Aqutsisoqarfimmi pisortaq Namminersorlutik Oqartussallu isumaqatiginninniartorisimasaat, André Steenholdt Guttesen, oqarpoq.
AAMMA ATUARUK Medlemmerne må vente flere måneder mere på lønforhøjelse
Ilaasortat qanoq akissaateqqortusitigissanersut isumaqatigiinngissutaanerpaasimasut soorunami ilagaat. SIK-lli - nunatsinni sulisartut kattuffiini annersaasup - tapisiat arlallit isumaqatigiissutinut aamma ilanngukkusussimagaluarpai, iluatsinngitsumilli.
- Tapisiat assigiinngitsut 58-it isumaqatigiissutinut ilanngukkusussimagaluarpavut, iluatsinnaguli. Isumaqatigiinniarnernili tulliusuni iluatsinniarsariumaarpavut, SIK-mi siulittaasoq, Jess G. Berthelsen, oqarpoq.
Iluarsiissutissiassaat tunniussuunneqalereerput
Isumaqatigiissutitoqaq 2018-imi apriilip aallaqqaataani atorunnaarpoq, isumaqatigiissullu nutaaq taamanikkulli atuutilereersimasussaagaluarpoq.
Taamaalinngitsoorporli, SIK-mimi ilaasortat akissaateqqortusinissaminnut ukiup aappaata affaanik sivisutigisumik utaqqisariaqarsimammata.
Isumaqatigiissut nutaaq atsiorneqaqqammersoq 2018-imi apriilip aallaqqaataa aallarnerfigalugu kingumoortumik atuutilerpoq. Isumaqatigiissut nutaaq naapertorlugu sulisut akissaateqqortusinertik ilutigalugu pisortanit iluarsiissutinik aamma aningaasarsissapput.
Aningaasaqarnermut Sulisoqarnermullu Aqutsisoqarfik naapertorlugu ilaasortat akissaateqqortusisut iluarsiissutisiassaat oktobarip naanerani tunniunneqarput.
AAMMA ATUARUK SIK's lokale afdelinger er tilfredse
Ilaasortat akissaateqqortusisut ilaat paasissutissanik nalunaarsuisimanngimmata suli tunniunneqanngitsunik tapeerasiassaqartinneqarput. Iluarsiissutisiassaat februaarimi tunniunneqarumaartut, Aningaasaqarnermut Sulisoqarnermullu Aqutsisoqarfiup ilimagaa.
Isumaqatigiissut nutaaq atsiorneqartoq isumaqatigiissutinut ataasiakkaanut 26-nut tunngavoq, 2022-milu marsip 31-ata tungaanut atuuppoq.
