Namminersorlutik Oqartussat sermitsiaq.ag naqqiissuteqaqquaat

Namminersorlutik Oqartussat allapput Tusagassiivimmi attaveqaqatigiinnermut pisortaq tassaasoq Sofia Geisler tamannalu allanngortinneqassanngitsoq, tamannalu pissutigalugu sermitsiaq.ag qinnuigineqarpoq paasissutissaq nalunaarutigisani naqqeqqullugu.

Namminersorlutik Oqartussat allaaserisamik naqqeeqqusinerat eqqumiiginarsinnaavoq, Sermitsiaq.ag-mmi allaaserisaani Namminersorlutik Oqartussat Tusagassiivianni atorfinitsitsinissamik allaqqasoqanngimmat. Paarlattuanillu isumaqarnarpoq Julie Rademacher partiimi Siumumi atorfeqartoq, tassanilu atorfinitsitsisarnerup Namminersorlutik Oqartussanit akuerineqarnissaa pisariaqarsorinanngikkaluartoq.

Ilisimatitsissutigineqarpoq Naalakkersuisut Siulittaasuata Naalakkersuisoqarfiata eqqarsaatigimmagu Naalakkersuisunut Siulittaasumut sullissisussamik tusagassiuutinut attaveqarnermi ataqatigiissaarisumik atorfinitsitsinissaq – soorluttaaq taamaassimasoq Naalakkersuisut siulii eqqarsaatigalugit. Suliaq taanna ingerlavoq, taamaattumik tusagassiorfiit allallu tamatuminnga soqutiginnittut qinnuigissavagut tamanna pillugu Naalakkersuisut Siulittaasuata Naalakkersuisoqarfianiit nalunaaruteqarnissamik utaqqeqqullugit, naalakkersuisoqarfimmi pisortaagallartoq Søren Stach Nielsen allappoq.