Namminersorlutik Oqartussat qararasaasianut IT-nut nutaamik atortortaalertut
Namminersorlutik Oqartussat qararasaasianut IT-nut nutaamik atortortaassapput.
IT-mut atortoq nutaaq Namminersorlutik Oqartussat kommunillu aningaasanik aqutsinerannut atortussiaavoq.
Tamannalu inuiaqatigiinnut iluaqutaassasoq, Aningaasaqarnermut Sulisoqarnermullu Aqutsisoqarfimmi pisortaq isumaqarpoq.
- Neriuppugut atortoq nutaaq allaffeqarfinni sunniuteqarluarumaartoq, pisortaq Lars Dencker oqarpoq.
Kommunit Namminersorlutillu Oqartussat aningaasanik aqutsinermut qarasaasiatigut maanna immikkut atortoqaput, IT-mulli atortoq nutaaq ikiortigalugu assigiimmik programmeqarlutik aningaasanik aqutsisinnaanngussapput.
- Ullumikkut atortorisat pitsaavallaarnatillu aserfallatsaaliorniarneri akisupput. Pisortaqarfinnilu paasissutissanik siammarteriniarluni ajornakusoortarpoq, Lars Dencker oqarpoq.
Naalakkersuisut IT-nut atortumut nutaamut 57.742.000 koruuninik aningaasanut inatsimmi ukiuni kingullerni immikkoortitsisareerput.
Taassuma saniatigut kommunit suliap naammassinissaanut atuutsilersinnissaanullu 25 millionit koruuninik immikkoortitsisut, Lars Dencker KNR-mut paasissutissiivoq.
Danmarkimi pisortat suliffeqarfiini IT-nut atortunut aningaasaliinernut atatillugu assuarnartuliortoqartareerpoq.
Tassami atortut kingusiinnaq aatsaat takkuttarsimapput aningaasartuutissatullu atugassat sinnerneqartarsimallutik.
IT-mulli tunngasuni pisiortorfiup Fujitsup atortoq pitsaasoq tunimmagu ajornartorsiuteqartoqarnavianngitsoq, Lars Denckerip oqaatigaa.
IT-mut atortoq nutaaq Namminersorlutik Oqartussani Kommuneqarfik Sermersuumilu januaarip aallaqaataaniit 2018-imiit atuutilissaaq, kommunillu sinneri 2018-ip ingerlanerani malinnaajumaarput.