Namminersorlutik Oqartussat pinngitsuutinneqarput
Misissuisitsineq arlaannaannulluunniit attuumassuteqanngitsutut, Naalakkersuisut siulittaasuata Naalakkersuisoqarfiani pisortap Svend Hardenbergip taavaa, suliarli Radioaviisimit sammineqalermat Svend Hardenbergip AG-mut kingorna nassuerutigaa, misissuisitsineq suliamut peqataasup saqqummiussaatut isigineqarsinnaasoq.
Eqqartuussissuserisoq Niels Hansen Damm misissuisuuvoq. Namminersorlutik Oqartussat matumani isornartorsiorneqarsinnaanngitsut, taassuma oqaatigaa, tassa Julie Rademacherimut tunngatillugu suliaq, Andreas Salmonymulluunniit suliaq matumani pineqarlutik.
Andreas Salmonyp misissuinermut peqataannginnissani nammineq aalajangiusimavaa.
Salmonyp inuusuttuunera misilittagakittuuneralu pissutaallutik Namminersorlutik Oqartussani inatsiseqarnermut pisortatut atorfeqarnissani naammaginartumik naammassisinnaanngikkaa, Niels Hansen Dammip misissuinermi inerniliuppaa. Salmonyp inuusuttuunera Niels Hansen Dammip misissuinermi inerniliinermini pingaartilluinnarsimavaa.
Inatsiseqarnermut pisortaq soraarsinneqarnermini qaammatini 18-ini akissarsianut naapertuuttunik ajunngitsorsiassarsivoq. Ajunngitsorsiat amerlassusaat Namminersorlutik Oqartussat nassuernerattut isigineqarsinnaapput. Nalunaarusiarli naapertorlugu taamaattoqanngilaq.
Andreas Salmony Søren Stach Nielsenimut, Naalakkersuisut siulittaasuata Naalakkersuisoqarfiani taamanikkut pisortaagallartumut unneqqarissimanngitsoq, kukkusumillu siunnersuisimasoq, Niels Hansen Dammip nalunaarusiamini inerniliuppaa.
Salmonyp tamanut oqaluttuannginnissaa Namminersorlutik Oqartussat pingaartimmassuk ajunngitsorsiassai taama amerlatigipput. Tassalu taamaammat nipangersimanissaa akilerneqarpoq, nipangersimanissaali sooq taama pingaartinneqartiginersoq nassuiarneqanngilaq.
Namminersorlutilli Oqartussat suliamut tunngatillugu toqqarsinnaasaat amerlanngillat, tassa ajunngitsorsiassaqartinneqassanersoq, taarsiivigineqassanersorluunniit, suliarli eqqartuussivitsigoortinneqassanersoq toqqarneqarsinnaallutik.
Eqqartuussivitsigoorsimassagaluarpalli inatsiseqarnermut pisortaasimasup inuusuttuunera eqqarsaatigineqarsimassagaluartoq, Niels Hansen Damm isumaqarpoq:
- Inatsiseqarnermut pisortaq inuusuttuummat, misilittagartuunanilu, suliaq eqqartuussivitsiguussagaluarpat inatsiseqarnermut pisortaq illersorneqassagunaraluartoq isumaqarpunga, Niels Hansen Damm, nalunaarusiami ilaatigut allappoq.
Søren Stach Nielsenip nalunaarusiami ilaatigut oqaatigaa Andreas Salmony arlalinnit isornartorsiorneqarsimasoq.
Salmonyli tamakku pillugit ilisimatinneqarsimanngilaq, soorlu aamma soraarsitaannginnermini mianersoqqussummik tunineqarsimanngitsoq.
