Air Greenlandip timmisartorsuanik Danmarkimut angalasoqaqqissinnaalertoq, Namminersorlutik Oqartussat Air Greenlandillu ilisimatitsissutigaat.Assi: KNR, Anton Gundersen Lihn

Namminersorlutik Oqartussat: Nunatsinniit angalasoqaqqissinnaalerpoq

Nunatsinniit ataasinngornermi angalasoqaqqissinnaalerpoq. Avammulli angalasut peqquteqavitsigatik nunatsinnut uteqqissinnaanngillat.

Suliffeqarfimmi innuttaasullu nunatsinnit Danmarkimut angalaniartut Air Greenlandip nittartagaa aqqutigalugu maajip ulluisa sisamaat aallarnerfigalugu angalanissaminnik inniminniisinnaanngorput. 

Naalakkersuisut Air Greenlandilu taama nalunaaruteqarput. 

Avammut angalaqqissinnaaneq sapaatit akunnerit arlallit coronavirusimik maanna tunillatsittoqaqqissimannginnera pissutaavoq.   

Tikittussat pisariaqavissumik angalanersut suli naliliiffigineqartassapput, nunatsinniillu aallartut uternissaminnut imaaliallaannarlutik bilitsisisinnaanngillat.

Nunatsinnummi angalanermik inerteqquteqarneq maajip 31-iata tungaanut atuuppoq. Suliartornissamut pisariaqavissumillu angalasariaqartut Namminersortut Oqartussanit akuersissummik aatsaat pisimappata nunatsinnut angalasinnaapput.

AAMMA ATUARUK Corona:Nunatsinnut tikittut tamarmik ullut tallimat qaangiukkaangata misissortittassapput

- Nunatsinnukartut suli misissuiffigineqartarnerisa taakkunannga eqqaamaneqarnissaa pingaaruteqartorujussuuvoq. Nunatsinniit aallartut ataasiakkaat aallaaviatigut eqqaamasariaqarpaat qularnanngitsumik maaji naallugu pissutsillu ajorseqqissappata immaqa sivisunermik nunatsinnut utersinnaanissaq periarfissaassanngimmat, Hans-Peder Barlach Christensen coronavirusimut tunngasunik suliallit sinnerlugit  oqarpoq.

Nunatsinnukarusuttullu aallannginnerminni coronavirusimik/COVID-19-imik tunillanneqarsimanermik misissortissimassallutillu nunatsinnut tikinnerminniit ullut tallimassaanni misissorteqqissapput.

Nunatsinnullu tikittut tikinnerminniit ulluni 14-ini angerlarsimaannartussaatitaapput.

AAMMA ATUARUK Coronamik ajornartoortitsigaluartoq: Pisortani sulisut soraarsitaanissaminnut ernumassanngillat

Danmarkimi killeqarfiit suli matoqqapput. Inuit peqquteqavissut taamaallaat Danmarkimut tikissinnaatitaapput.

Tamanna maajip ulluisa qulingannut atuuppoq. Danskit naalakkersuisui Danmarkip avammut ammariartuaaqqinnissaanut pilersaarusiamik sapaatit akunnerisa matuma naanerani saqqummiussissasut, Danmarkip ministeriunerata Mette Frederiksenip siumut nalunaarutigereernikuuaa.

Isummersuutit