Namminersorlutik oqartussat kultureqarnermut nersornaataat tunnuinneqarpoq
Nersornaatinik agguaassisoq tassaavoq Kultoreqarnermut Naalakkersuisoq Mimi Karlsen. Anne-Birthe Hovep napparsimanini peqqutigalugu nersornaat nammineerluni aasinnaanngimmagu ernerisa sinnerlugu tiguaat. Ole Kristiansenilli nersornaatisiassani nammineerluni tigummagu ilumigut attortisimaarpalaarpoq.
Anne-Birthe Hove suliaqarnialeraangami piareersarluaqqissaartarpoq, eqqumiitsuliornerminilu atortussami periarfissaanut eqqummaarilluni oqaluttuarumasartuulluni. Taanna nutaaliortuartuummat uniffeqanngiusartuullunilu eqqumiitsuliani aqqutigalugit innuttaasunik aalassatsitsisaraluarluni eqqarsariaammersitsisaraluarlunilu eqqumiitsuliaminut tunniusimalluartuuvoq, Mimi Karlsen, eqqumiitsuliortoq ukiorpassuarni Nunatsinni eqqumiitsuliornikkut nuimalluartutoqaq pillugu nersornaasiinnginnermini taama oqalugiarpoq.
Ole Kristiansen, inuiaqatigiinni pissutsinik isornartorsiuisartutut ilisimaneqartoq Namminersorlutik Oqartussat kultoorimut nersornaataanik tunineqarnini tulluusimaarutigeqaa, ileqqumisullu maniguussimaarpalaarluni nersornaatissani tigullugu:
- Taamatut nersornaaserneqarnera ukiut ingerlanerini erinniama taalliamalu inuiaqatigiinnit nersorniarneqarnerattut isigaara. Taamaammat assorsuaq nuannaarpunga tulluusimaarlungalu.
Eqqumiitsuliortup eqqumiitsuliani aqqutigalugit inuiaqatigiinnut saaffiginnittarpoq, uangalu nipilersorneq aqqutigalugu taamaasiortarlunga. Taamaammat inuiaqatigiit Kalaallit suliarisimasannut nuannarinninnerat taamaasilluni uannut paasitinneqarpoq, Ole Kristiansen, 1988-imi nuusioqqaartoq knr.gl.-imut taama naqissusiivoq.
