Namminersorlutik Oqartussat kommunillu suleqatigiinnerat pitsanngorsarneqassaaq

Tamatumunnga atatillugu Naalakkersuisunut ilaasortat, nunatsinni borgmesterit sisamaasut kommunit kattuffiannilu siulittaasup inuiaqatigiinni ukiuni aggersuni suliassat pillugit ataatsimeeqatigiipput.

Pisortani suliassat ingerlanneqarnerinut pisariillisaanermullu tunngatillugu nutaamik eqqarsarnissaq pisariaqarpoq. Pisortat aningaasartuutaat amerliartorput. Taamaammat illuatungeriit iliuusissamik pilersaarut akuersissutigeqqammerpaat, pisotani suliassanik ingerlatsinermik arlalitsigut pitsanngorsaanissaq anguniarlugu.

-Kommunini suleqatigisannik ullumi naapitsinera nuannareqaara. Nutaanik isumaqatigiissute­qar­nis­satsigut aningaasanut tunngassuteqartut piinnarnagit aammali pisortat ingerlatsiviisa suleqatigiin­nerat ataatsimut isiginerullugu ukkatariniarparput. Ingerlatsinerup sanaartornerullu pilersaarusior­ne­qarneranni innuttaasut ukioqatigiiaat qanoq agguataarneranni pissutsit allannguutissaat eqqumaf­fi­gisariaqarput, aningaasaqarnermut naalakkersuisoq Vittus Qujaukitsoq nassuiaavoq.

Suleqatigiinnermi pitsanngorsarniagaq tassaavoq innuttaasunik sullissineq, tamannalu sullissinerup qanoq ingerlanneqartarnerata ersarissarneqarneratigut pisinnaavoq. Taamaaliornikkummi nunatsinni innuttaasut tamaasa assigiimmik atugassaqartinneqalissapput.

- Taamaattumik ingerlariaqqinnissami pingaartorujussuuvoq innuttaasut susassaqartutut misiginis­saat peqataatinneqarnissaallu. Aammami innuttaasut atugarissaarnissaat tamatumani pineqarpoq. Pitsanngorsaanerillu kissaatigineqartut anguneqarsinnaassappata aalajangiisuulluinnassaaq allaffis­sornermi qarasaasiaqarnikkut systemit siunissami pisortaqarfinni assigiinngitsuni ’imminnut oqa­luus­sinnaanissaat’, imaappoq suleqatigiissinnaanissaat, KANUKOKA-p siulittaasua Martha Abelsen oqarpoq