Namminersorlutik Oqartussat Kommuneqarfik Sermersuullu inissianik attartortitseqqiisarneq 2019-imi upernaakkut saqitsaatigilerpaat. Assi: KNR / Malik Brøns

Namminersorlutik Oqartussat Kommuneqarfik Sermersuullu inissianik attartortitseqqiisarneq saqitsaatigigaat

Kommuneqarfik Sermersuup inissianik 2015-imili attartortitseqqiisalersimanera inatsisinik unioqqutitsinerunersoq, Namminersorlutik Oqartussat misissuleruttorpaat.

- Isumaqarpunga innuttaasunut malunnaatilimmik angusaqarniarsarinata inatsisilerinermut nukippassuarnik atuinerput erloqinartoq.

Kommuneqarfik Sermersuup borgmesteria, Charlotte Ludvigsen, kommunip Namminersorlutik Oqartussallu inissianik attartortitseqqiineq pillugu saqitsaannerat pillugu taama oqarpoq. 2019-imi upernaakkut saqitsaatilerput. Kommunip inissianik innuttaasunut attartortitseqqiisarnera inatsisinik unioqqutitsinerunersoq misissuiffineqarnera pillugu saqitsaapput. 

Suliaq pillugu paasissutissat

 

Nunamut Namminermut Immikkoortortaqarfiup Kommuneqarfik Sermersooq inissianik aalajangersimasumik najugaqarfissanik amigartooruteqarfiusumik attartortitsisarnermik unitsitsissasoq februaarimi peqqussuteqarfigaa.

 

Nakkutilliisoqarfik taamaaliorneq pisortat inatsisaanni malittarisassanik atuuttunik unioqqutitsinertut nalilermagu peqqussuteqarpoq.

 

Kommuni inissianik 2015-imili attartortitseqqiisalerami inissianik 416-inik attartortitseqqiivoq.

 

Nunamut Namminermut Immikkoortortaqarfik tamanna pillugu suliamik Kommunit Nakkutilliisoqarfiannut ingerlatitseqqeeratannginnermini suliaq pillugu paasissutissanik allagaatinillu suli pissarsiuleruttorpoq.

 

Nunamut Namminermut Immikkoortortaqarfik Naalakkersuisut Siulittaasuata Naalakkersuisoqarfiata ataani inissisimallunilu Kommunit Nakkutilliisoqarfiannut allattoqarfiuvoq.

 

Nakkutilliisoqarfiup kommunalbestyrelsit ingerlatsinerminni aqutsinermut inatsimmi malittarisassanik naapertuinersut pisortallu inatsisaanni malittarisassat atuuttut naapertorlugit ingerlatsinersut nakkutigisarpai. 

 

Tusarfik: Naalakkersuisut Siulittaasuata Naalakkersuisoqarfiata allakkatigut peqqussutaa aamma naalakkersuisut.gl 

Kommuneqarfik Sermersooq, Nuummi inissaaleqineq iliuuseqarfiginiarlugu, namminersortut inissiaataannik innuttaasunut 2015-imi attartortitseqqiisalerpoq. Tamanna inissianik maannamut 416-inik attartortitseqqiineranik kinguneqarpoq.

Kommunilli namminersortut inissiaataannik attartortitseqqiinermut aningaasartuutai attartortut ineqarnermut akiliutigisartagaannit amerlanerupput. Tassa imaappoq, kommunip attartornermut isumaqatigiissuteqarnikkut amigartoorutit tamaasa matussusertarpai.

Tamanna kommunimut assersuutigalugu ukioq manna 11 millionit koruuninik akeqarpoq, tamatumunngalu isumaqatigiissutit kommunimut ukiuni pingasuni tulliuttuni 17 millioninik akeqassallutik. Taamaaliorneq akisuginarsinnaavoq, kommunimulli akikinnerpaasoq kommuni isumaqarpoq. Inissianik attartortitseqqiinani  nutaanik inissialiortitsisinnaavoq - tamannali akisunerussalluni.

Namminersorlutik Oqartussat peqqussuteqartut

Tamanna amigartoorutaaginnarani attartornermut inatsimmik aamma unioqqutitsinerullunilu kommunit aningaasaqarnikkut isumatusaartumik iliuuseqarnissamut pisussaaffiinik naammassinninnginneruvoq. Eqqartuussissuserisoqarfik, Poul Schmith, Namminersorlutik Oqartussanit suliakkerneqartoq taama naliliivoq.

Namminersorlutik Oqartussat kommunip inissianik attartortitseqqiinerminik suliap qulaajarneqarnerani unitsitsigallarnisaanut peqqussuteqarsimasut, eqqartuussissuserisoqarfiup nassuiaasiaani allaqqavoq.

Eqqartuussissuserisoqarfik, Hjorten, suliamik taassuminnga kommuni sinnerlugu qulaajaavoq. Taanna isumaqarpoq, kommuni inatsisinik naapertuillunilu aningaasaqarnikkut isumatusaartumik iliuuseqarnissamut pisussaaffinik naammassinnissimasoq.

Kommuneqarfik Sermersuup borgmesteriata, Charlotte Ludvigsenip, Namminersorlutik Oqartussat peqqussuteqarnerat uissuummissutigaa. Kommuni Nuummi inissaaleqinerup iliuuseqarfiginissaanut pisussaaffeqartoq periuserlu tamanna akikinnerullunilu inissianik nutaanik pissarsilertorfiusoq, taanna oqarpoq.

- Nuummmi inissaaleqinerujussuaq ukiorpassuarni atuuppoq, kommunalbestyrelsilu tamanna iliuuseqarfiginiarlugu aalajangernikuulluni. Inissianik pissarserusulluta namminersortut inissiaataannik attartortitseqqiivugut. Ilumoorpoq tamanna amigartoorutaasoq, namminerli inissialiortitsinermit akikinneruvoq, Charlotte Ludvigsen oqarpoq.

Attartornermut nutaanik isumaqatigiissuteqanngitsoq

Kommunip inissiiaatileqatigiiffia Iserit aqqutigalugu initaarnissamut utaqqisut amerlajuarsinnarput. Taamaammat inissarsiortut tamanna pillugu suliamit aaamma eqqugaapput. Soorlu ilinniartut angajoqqaaminni Nuummi inissaaleqineq pissutigalugu najugaqaannartariaqartartut, Charlotte Ludvigsen oqarpoq.

- Taamaammat inissianik attartortitseqqiisinnaajunnaarallarpugut, tamannalu soorunami ajuusaarutigaara. Initaarnissaminnut utaqqisut pilertornerusumik ikilisikkusukkaluarpavut. Iseritsimit initaarnissaminnut utaqqisut maanna 1758-iupput. Taakkulu amerlavallaarput. Ilaat initaarnissaminnut ukiuni 21-ni utaqqisarput, Charlotte Ludvigsen oqarpoq.

Namminersorlutik Oqartussat Nunamut Namminermut Immikkoortortaqarfia KNR-imit apersorneqarumanngilaq. Immikkoortortarli tamanna pillugu suliap Kommunit Nakkutilliisoqarfiannut ingerlateqqinneqannginnerani tamanna pillugu paasissutissanik allagaatinillu suli pissarsiuleruttortoq, immikkoortortap pisortaa, Klaus Georg Hansen, mailikkut allappoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat