Namminersorlutik Oqartussat IMAK-ilu nutaamik isumaqatigiissuteqartut
Isumaqatigiinniarnerillu angusaqarfiusumik ataqqinnissuseqartumillu ingerlanneqartut, André Guttesen Namminersorlutik Oqartussaneersoq ilinniartitsisullu kattuffiani siulittaasoq Sivso Dorph taama allapput.
Illua`tungeriit atugassarititaasunut isumaqatigiissutit ukiormanna marsip 31-iani atuukkunnaartinnagit isumaqatigiissuteqarnertik iluarisimaarpaat angusarineqartullu atsioqatigiissutigalugit.
Isumaqatigiiniarnerit aallaaviusumik sinaakkusiussap 3,50 %-iusup iluani ingerlanneqarput, taassumalu avataatigut aningaasanik immikkoortitsoqarpoq, atuarfinni aqutsisuusut aningaasarsiaasa qaffassutigisaannik. Tamatumani siunertaavoq aqutsisuulluarsinnaasunut aqutsisuunissap kajuminnarnerulersinnissaa nunatsinnilu atuarfeqarfiit ataatsimut isigalugit pitsaanerulersinnissaat.
Angusarineqartut sulisitsisunit, tassalu kommuninit aamma namminersorlutik oqartussanit inaarutaasumik akuerineqassapput, taamatullu aamma IMAK-ip ilaasortaanit taasisitissutigineqassallutik.
