Oktobarimi novembarimilu anorersuartaqattaarnerata kinguneranik Namminersorlutik Oqartussat Allaffeqarfissuat, Nuuk Centerimiittoq imermit ajoquserneqarpoq. Illorsuup sananeqarneraniit ukiut marlunngitsulluunniit qaangiuttullu, illorsuup oqorsaatai iikkallu gibsitaat allaffinni arlalinniittut isugutsersimapput, oqoqalaalersimasorlu paasineqarluni.
Namminersorlutik Oqartussat inissiaatileqatigiiffiata Illuut A/S -ip illorsuarmik piginnittuusup, sanaartortitseqatigiillu MT Højgaardip tusagassiuutinut nalunaarumminni pisoq assut ilungersunarnerarpaat.
Suliaq Namminersorlutik Oqartussat suleqatigeqqissaarlugit pivoq. Iluarsiissutissat pisariaqartut suliarineqarput, taamaalilluni oqoqalernissaa pinngitsoortinneqarsinnaalluni. Atortut isugutsersimasut ajortissimasullu tamarmik masassinnaanngitsunik taarsersorneqassapput.
Allaffeqarfiit tamarmik sapaatip-akunnerata naanerani misissorneqartussaasut, iluarsagassallu tamarmik juullimi sulinngiffeqarneq naatinnagu naammassineqassasut, tusagassiuutinut nalunaarummi oqaatigineqarpoq. Sulisut peqqinnissaat eqqarsaatigalugu suliaq aallaqqaammut aaqqiigallarnerussaaq.